Deira gana ‘The Battle of The Folk Bands’ del Celtic Connections

Nun pudo resultar meyor la primer esperiencia de Deira en tierres escoceses. El tríu asturandaluz participó nel prestixosu Celtic Connections de Glasgow al ser escoyíu como una de les cuatro formaciones finalistes del concursu ‘The Battle of The Folk Bands’, del que se proclamó ganador, y sonar nuna radio del país.

La Drygate Brewery acoyó’l 29 de xineru, a la 1 de la tarde hora llocal, esti eventu encuadráu nel festival que s’allargó del 20 de xineru al 6 de febreru. Xunto cola banda formada pol asturianu Gonzalo Llao (bouzouki) y los andaluces Salvador Daza (violín) y Juan Almaraz (flauta irlandesa) pasaron el corte los escoceses Kenneth MacFarlane Band, Ruach y The Auldeners.

La música de Deira convenció al xuráu, hasta’l puntu de llevar la victoria nesti concursu. Tamién, previamente, pudo sonar nel Danny Kyle Open Stage, en Celtic Music Radio, celebráu esti añu en llinia.

Con presencia confirmada nel Festival Internacional do Mundo Celta de Ortigueira d’esti añu, esti gallardón supón un reblagu na carrera d’un tríu con munchu futuru y, agora, un nome n’Alba.