Decenes de conceyales usen l'asturianu na toma de posesión

IxA informa de que conceyales de más de 20 conceyos ficieron la promesa o xuramentu n’asturianu. En Xixón hasta 7 conceyales de Xixón sí Puede, IX y Foro usaron esta fórmula

No que cinca a los conceyos de les grandes ciudaes del centru d’Asturies, hebo representantes que xuraron o prometieron n’asturianu en Xixón, Avilés y Uviéu, con conceyales del PSOE, Foro, Izquierda Xunida y les formaciones venceyaes a Podemos. Amás, xuraron cargu n’asturianu o gallego-asturiano en Villaviciosa, Carreño, Llanera, Siero, Noreña, Mieres, Llangréu, Llaviana, Ribeseya, Cangues d’Onís, Peñamellera Alta, L.lena, Uviéu, La Ribera, Sobrescobiu, Pravia, Bimenes ya Ibias.

Dende Iniciativa pol Asturianu valorase "de forma mui positiva que l’usu del asturianu fuere tresversal y qu’usaren l’asturianu, como patrimoniu que ye de toos, formaciones de tou tipu: PSOE, les candidatures de Podemos (como Xixón sí puede, Somos Llangréu, Nós Ibias, Somos Siero, etc.) Foro, Izquierda Xunida, Partíu Asturianista, IAS, Conceyu Abiertu por Noreña, asina como otres formaciones llocales".

La organización recuerda que "esti xestu, que valoramos de forma mui favorable tien d’acompañase dende’l primer día con midíes ya iniciatives empobinaes a meyorar la situación del asturianu nel ámbitu de los conceyos, onde ye necesario usar l’asturianu, recuperar y oficializar la toponimia tradicional, aprobar ordenances de normalización o poneles en marcha ellí onde yá esisten, da-yos un meyor usu y estabilidá a los servicios de normalización llingüística y facer polítiques tresversales que-y dean presencia al asturianu en tolos ámbitos de la xestión de los conceyos".