De la defensa de Migoya al ataque del PP

La conseyera de Cultura, Ana Rosa Migoya, defendió na Xunta Xeneral el Plan de Normalización Social del Asturianu y dixo que los qu'ataquen el plan porque nun esiste oficialidá asítiense nel "inmovilismu". La Conseyera llegó a facer parte de la so intervención n'asturianu, afirmando testualmente que "el consensu güei posible nun ye necesariamente'l máximu teóricu, pero sí la ferramienta viable p´avanzar nesti momentu".

Migoya, que compareció na Xunta Xeneral acompañada pol conseyeru d'Educación, José Luis Iglesias Riopedre, aseguró que'l Gobiernu asturianu "nun va a desaprovechar la oportunidá" qu'apurre'l plan pa "dignificar el papel del asturianu y potenciar el so usu". Según la conseyera, "ensin normalización sociollingüística nun hai recuperación nin dignificación de la llingua" definiendo'l plan como un instrumentu que "pretende superar suspicacies, polémiques y malos entendíos que punxeron enzancos na puesta en marcha de polítiques adecuaes".

Pa la representante de Cultura, el papel del plan ye contribuyir a llargu plazu "a que la cuestión del bable acabe siendo dalgo asumío por toos de manera normal fomentando progresivamente l'usu del asturianu nes alministraciones y los medios de comunicación, faciendo polítiques normalizadores en collaboración colos ayuntamientos y garantizando l'enseñu del idioma nes escueles". Migoya sorrayó que se trata del primer plan de normalización llingüística qu'apreba un Gobiernu asturianu y esplicó que tien "vocación de consensu mayoritariu" dientro de la Cámara.

Pela parte del PP intervino Joaquín Aréstegui que dixo qu'el Plan "busca más l'efectismu que la eficacia" y que namás se xustifica "pola oportunidá de llavá-yos la cara a los compañeros de gobiernu del PSOE tres de la so renuncia a la oficialidá". El diputáu avilesín dixo que'l Plan "fracasó estrepitosamente" y fizo chancia del fechu de que parte de la intervención de la conseyera se ficiere n'asturianu asegurando qu'ello yera parte de la "escenificación" que se gasta ente PSOE y IX-BA cuando se trata el tema del asturianu.

Paloma Uría,qu'intervino por IX-BA manifestó'l sofitu de la so coalición al Plan, pero ensin arrenunciar por ello al oxetivu de la oficialidá