David Rivas refuga encabezar la llista electoral d’Andecha Astur

L'economista David Rivas, qu'encabezare les llistes electorales d'Andecha Astur nes últimes convocatories electorales a les que se presentó esta formación nacionalista, fizo saber a la executiva del partíu que dirixen Germán Abad y Roberto Holgado, la so renuncia a encabezar la llista d'Andecha nes próximes elecciones al parlamentu asturianu

David Rivas, que saliera escoyíu como candidatu nel Conceyu Nacional de la organización celebráu nel añu 2006 en Candás, reconoz na carta la llexitimidá de la Xunta Executiva escoyida en Candás y asegura que tomó esta decisión dempués de pensala muncho y d'intentar facer, valiéndose de la llexitimidá del so cargu, una mediación pa evitar una rotura nel partíu.

Rivas llamenta que'l so intentu de mediación "nun llegó a bon puertu" y denuncia que nel procesu "una bona parte de la organización, y especialmente dellos significaos militantes prefirieren el conflictu" polo que'l profesor d'economía de la Universidá Autónoma de Madrid, qu'asegura que vía como la la so llexitimidá "quedaba amenorgada a midida que s'exercía" intentando llegar a una solución, entiende que "el consensu del Conceyu Nacional tá rotu" y que polo tanto "ye'l momentu d'un cambéu na organización". La persona que defendiere les sigles d'Andecha Astur nes últimes elecciones entiende que'l cambéu "que va dase" na organización aconseya "camudar tamién les cares y los perfiles de los que representaron o representamos estratexes anteriores". El mesmu Rivas asegura que nun contaba con siguir presentándose como candidatu más allá del 2010 y muéstrase agradecíu a les persones que s'enfotaron nelli nestos años.
Ver la carta na web d'Andecha Astur