Darréu intensifica la campaña de denuncia de la emigración forciada que sufre la mocedá

Estes selmanes últimes, coincidiendo col regresu de miles d’asturianos a los sos llugares d’orixe poles fiestes navidiegues, aprovechóles Darréu pa intensificar la campaña de denuncia de la emigración forciada que vive la mocedá asturiano. La organización ta acabante de celebrar el so V Conceyu Nacional, nel que decidió desvenceyase dafechu d’Andecha Astur.

La Mocedá d’Izquierda Soberanista escolingó pancartes, desendolcó pintaes y realizó repartos de pasquinos en llugares bien simbólicos, como la Estación d’Autobuses d’Uviéu. Nestes fueyes, Darréu recuerda qu’Asturies lidera nel Estáu’l ranking de la emigración forciada ente la mocedá, suponiendo’l 5 por cientu del total estatal cuando la xuventú asturiano constitúi’l 2,5 por cientu de la población. Esti emplegu, amás, suel ser precariu, lo qu’agrava enforma más la situación de los que tienen que colar. “Dende Darréu nun vemos otra solución posible a estes problemátiques que nun seya la soberanía política y económica p’Asturies, única manera de frayar les cadenes de subordinación al Estáu español y la Xunión Europea, y a les polítiques sucursalistes y capitalistes que tán soterrando Asturies”, apunten dende la organización.

La intención de Darréu ye continuar con esta campaña “col envís de siguir espardiendo non solamente la esistencia d’esta problemática, sinon les causes y el camín pa solucionala dende la perspeutiva soberanista, socialista y feminista”.

Frayamientu del venceyu con Andecha

El mes pasáu tuvo llugar la celebración del V Conceyu Nacional de Darréu, que tuvo como novedá principal la decisión de la organización de formalizar lo que na práutica yá yera un fechu, esto ye, el frayamientu de los llazos formales con Andecha Astur. Nel 2004 Darréu nacía pa cubrir el güecu dexáu por Andecha Mocedá tres diverxencies ente la so militancia pol camín a siguir y facíalo venceyáu con Andecha Astur, “organización referencia” de la izquierda soberanista nesi tiempu. Les “distintes lluches internes y discrepacies que provocaron una constante perda de militancia rumbu a otros proyeutos, o direutamenta a la desmovilización” fixeron, n’opinión de Darréu, que la formación nacionalista perdiera esi papel, dalgo que consideren que tamién afeutó al furrulamientu de l’agrupación moza, con una “mengua d'intensidá y calidá del trabayu durante dicha etapa”. Sicasí, nun arrenuncia “a unes rellaciones normalizaes con Andecha Astur dende la perspeutiva de dos organizaciones soberanes, pero como parte del mesmu movimientu”.

Tres un análisis del contestu actual de la izquierda nacionalista, Darréu apunta necesario dar “los pasos afayadizos que contribuyan al procesu de rearticulación de la izquierda soberanista”, viendo imprescinble “la construcción d'un referente de mocedá que tola izquierda soberanista sienta como suyu  y que complemente asina esi mesmu rol cumplíu na estaya estudiantil pola XEA”. Al respeuto, considera que los venceyos formales con una sigla concreta “suponen una torga nel procesu” y apuesta por participar nos espacios que se tán formando nel país, como ¡Asturies en pie!: “Entendemos que Darréu tien que ser dafechamente soberana, ensin nengún tipu de venceyu formal con nengún partíu políticu, siendo esclusivamente la organización de Mocedá d'Izquierda Soberanista referente d'Asturies. Esto va permitir ameyorar el desendolcu d'esta voluntá de trabayu ampliu con otros coleutivos ensin xenerar nengún tipu de rocea nin confusión ente les 23 estremaes sensibilidaes que puedan participar d'elles, frutu de los vínculos formales anguaño esistentes”.

“Poro, pa Darréu entama un nuevu contestu, una nueva etapa na que simplemente afitamos l'apueste pol que venimos trabayando nos caberos años: xunidá non a cualquier preciu, dende unos mínimos ideolóxicos y estratéxico-táuticos, pero tamién dende la necesaria xenerosidá requerida pa qu'esa xunidá, plantegada dende'l trabayu de cai y de base, seya una realidá”, afirmen nel documentu políticu que se pue consultar al final d’esta noticia.