Día de la Mocedá Revolucionario 2014

|
XI Asturies nun escaez

La organización xuvenil asturiana Darréu entama'l 17 y 18 d'ochobre'l Día de la Mocedá Revolucionario 2014, con numberoses actividaes como charra, mesa redonda, alcuentru internacionalista, o un conciertu (XI Asturies Nun Escaez) que, ente otres coses, supondrá la torna a los escenarios de los riosanos Avientu 14 años depués. A too ello súmase la iniciativa DMR Solidariu, pa la recoyida d'alimentos non perecederos destinaos al bancu de Paraos y Precarios d'Asturies.

El vienres 17 les actividaes tendrán como enclave’l Llocal Cambalache (Cai Martínez Vigil, 30), y entamarán a les 18:00 con una charra sobre la revolución d’ochobre de 1934, a cargu de los hestoriadores Eduardo Abad y Sergio Alonso Pampliega.

A les 19:15 habrá una mesa redonda alrodiu les lluches populares na Asturies d’anguaño. Na mesma va a cuntase cola participación de la Plataforma Feminista d’Asturies; Santi Fano (mayestru, pedagogu ya investigador), pa falar alrodiu la Llingua Asturiana; el sindicalista Paco Iglesias (Corriente Sindical d’Izquierda), y Adrián Calvillo (Darréu), sobre mocedá. Pa finar la xornada, un pinchéu popular a les 21:00.

El sábadu siguirá l’actividá en Cambalache de magar les 12:00 con un alcuentru internacionalista, nel que les distintes delegaciones internacionales amosarán les sos problemátiques y lluches. Pa siguir la xornada, una Xinta Popular (fabada y arroz con llechi, preciu 6 euros) que va preceder a una ruta pelos sitios clave de la revolución d’ochobre, dende les 16:00 a cargu d’Amaia Caunedo y con salida nel Cimenteriu d’Uviéu.

A la fin d’esta ruta, haza les 19:00, tendrá llugar frente a la Sala Sir Live un actu escontra la emigración forciada de la mocedá.

Pa rematar la xornada y el DMR 2014, el conciertu XI Asturies Nun Escaez na Sala Sir Live, dende les 20:00 hores con Skama La Rede, Avientu, Ochobre, La Tarrancha y Skontra. Tanto durante’l conciertu como nel restu d’actividaes va llevase alantre’l “DMR Solidariu”, iniciativa cola que la organización anima a traer un kilu de comida non perecedero que va ser destinao a la despensa popular autoxestionada que desendolca l’Asamblea de Para@s y Precari@s d’Asturies.

Contador Estadistiques