Cursu de Llingua Asturiana nel conceyu Gozón

La Mancomunidá Cabu Peñes en collaboración cola Conseyería de Cultura Comunicación Social y Turismu del Principáu d'Asturies organiza un cursu d'asturianu que con 30 hores de duración y nivel d'aniciu va tener llugar en Lluanco los próximos martes y xueves n'horariu de 18:30 a 20:30. La inscripción ye de baldre y les clases van dase na Casa La Escribana, a tolos alumnos qu'asistan y superen el cursu entregaráse-yos el correspondiente diploma acreditativu. El plazu matrícula fina'l día 22 de febreru y pa informase o apuntase ye preciso mandase al Serviciu de Normalización Llingúística de la Mancomunidá del Cabu Peñes (C/ El Fuerte, Peroño, Lluanco) o a la Oficina d'Información a la Mocedá (Casa la Cultura, Parque Zapardel, Lluanco), esistiendo tamién los teléfonos 985883532/ 985884737 y el corréu eléctronicu mmcp.llingua@asturnet.es

Esta actividá enmárcase na política de normalización llingüística que la Mancomunidá Cabu Peñes vien desendolcando nos últimos tiempos. Esta política normalizadora cola Llingua y Cultura Asturiana púnxose de manifiestu na creación del Serviciu de Normalización Llingüística, la tramitación de los espedientes toponímicos de los conceyos de Carreño y Gozón (el de Carreño yá ta esperando la so aprobación definitiva pol Conseyu de Gobiernu del Principáu d'Asturies y el de Gozón ta na cabera fase d'estudiu). Nestos momentos tamién ta desendolcándose un seminariu de Llingua y Cultura Asturiana nel Conceyu de Carreño, que como ocurre davezu tuvo una gran acoyida. Dientro de les actividaes puestes tamién en marcha hai de destacar la rotulación billingüe de les Cases del Conceyu de Carreño y de Gozón. Dientro de lo que ye l'alministración tamién ye de destacar l'espublizamientu billingüe de tola documentación y publicidá, asina como bandos, actes y plenos de la Mancomunidá Cabu Peñes y de los Conceyos de Gozón y Carreño.