Cultura y Educación presenten una nueva campaña pola matriculación en llingua asturiana

Les conseyeríes d'Educación y de Cultura del Gobiernu asturianu van llevar alantre nestos meses en que se fai la campaña de matriculación nos centros educativos una campaña informativa pa fomentar la matriculación d'alumnos nes asignatures de llingua asturiana y gallego-asturianu.

La campaña, que s'inxerta dientro del marcu del Plan pa la Normalización Social del Asturianu, empobínase al alumnáu de los centros educativos públicos y concertaos y quier esparder el conocimientu d'esta asignatura, d'ufierta obligada polos centros y que s'inxerta dientro del estoyu d'asignatures optatives ente les que puen escoyer los alumnos. Los materiales de la campaña incluyen l'unviu de carteles, dípticos y comunicaciones col llema "Yo apúntome tamién a llingua asturiana porque nun voi dexar de llau nada que m'enriqueza" a cerca de 465 centros públicos y privaos concertaos, amás del inxertamientu d'anuncios en prensa y radio. La campaña va tener un coste de 40.000 euros, y va desarrollase ente'l 9 y el 19 de mayu.

Na presentación de la campaña esplicóse que nel cursu escolar presente, el númberu d'alumnos de primaria, secundaria y bachilleratu matriculaos n'asturianu o en gallego-asturianu ye en total de 18.701, espardíos ente 292 centros nos que ponen clas d'asturianu 196 profesores. Estremando per estayes educatives 14.999 correspuenden a educación primaria, lo que supón 154 más que nel cursu 2004-2005. Otros 3.652 tan en secundaria, que rexistró una xuba de 50 alumnos respective al cursu anterior, mientres que nel bachilleratu la cifra d'alumnos ye de 238 a bachilleratu, 137 más que que nel cursu 2004-2005. Pal cursu qu'entra van espublizase los llibros de testu de primeru y segundu de Bachilleratu, en cuantes que yá tan asoleyaos los volumes que correspuenden a los cuatro cursos de la ESO.