Cultura va pidir la intervención de la Fundación Selgas-Fagalde y estudia llevar a los tribunales la venta del Aníbal de Goya

El Gobiernu d'Asturies va pidir al Protectoráu de Fundaciones la intervención de la Fundación Selgas-Fagalde. La Conseyería de Cultura estudia tamién la posibilidá d'interponer acciones pa determinar la llegalidá de la venta de la obra 'Aníbal vencedor que por primera vez contempla Italia desde los Alpes', de Goya. 

L'anunciu d'estes acciones por parte de Cultura sumóse a los fechos públicos ayeri: la solicitú a la presidencia de la Fundación Selgas-Fagalde de la realización d'una auditoría de les sos cuentes esterna y independiente de forma inmediata”, yá solicitada pola conseyera de Cultura, Berta Piñán, na xunta del patronatu'l pasáu 21 de xunu; el requerimientu pa qu'unvie a Cultura l'inventariu de la colección artística vinculada a La Quinta d'El Pito “nel plazu de 20 díes”; y la pitición al Protectoráu de Fundaciones d'una serie de documentos sobre los estatutos, el fondu dotacional y les cuentes de la Fundación. 

La Conseyería de Cultura vieno realizando dende xineru diverses solicitúes d'información a la Fundación Selgas-Fagalde no que fai a la so colección artística, al empar que s'avanzaba na preparación del espediente pa la declaración como BIC de tol conxuntu patrimonial vinculáu a los Selgas n'El Pito. 

Al empar, analizó la llegalidá de los alcuerdos adoptaos sobre la venta de los cuadros de Goya y El Greco, por considerar que pueden existir omisiones de requisitos obligatorios y formales na tramitación de la venta de bienes de la Fundación que podríen atentar contra los fines fundacionales, les previsiones estatutaries y la Llei de Fundaciones. De resultes de too ello, xunto coles revelaciones apaecíes en prensa nos últimos díes, la Conseyería de Cultura va pidir al Protectoráu de Fundaciones del Ministeriu de Cultura y Deporte la necesidá de que valore la intervención de la Fundación Selgas-Fagalde.