Cultura va dar güei miércoles el premiu al meyor cantar en llingua asturiana

La música fecho n'asturianu recibe güei un homenaxe especial cola entrega del Primer Premiu al Meyor Cantar n'Asturianu, que va facese dende les 20:30 hores en Teatru Filarmónica d'Uviéu. El premiu, anque nun tien recompensa en metálicu, consiste nuna escultura de María Jesús Rodríguez, valorada nel circuitu artísticu en más de dos mil euros, y plantease como una plataforma de promoción pal artista ganador, garantizando-y a la so obra una difusión especial nos medios decomunicación y nos eventos promovíos pol Gobiernu. Los periodistes Sonia Fidalgo y Naciu Varillas van presentar la gala, na que va actuar la cantante María del Mar Bonet, quien va incluyir un cantar n'asturianu nel so repertoriu.

El premiu, que naz con vocación de ser añal, quier reconocer al meyor tema orixinal con lletra n'asturianu, escluyendo a los cantares tradicionales.

Pa esta primer edición del premiu, la Conseyería de Cultura fexo yá una preselección de cantares énte los qu'un xuráu nomáu pola mesma Conseyería va escoyer al ganador. Na escoyeta figuren los temes "La maleta al agua", inxertu nel últimu discu del grupu Tejedor y con lletra de Ruma Barbero, el cantar de Carlos Rubiera "Yá nun van a la Camocha", "Exit-encia" del grupu La Tarrancha, "Azul y Gris" del cantautor Toli Morilla con lletra del mesmu Morilla y de la filóloga Marta Mori y 10/8, del grupu Asgaya con lletra de Sergio Álvarez, cinco temes que representen otros tantos estilos estremaos de facer música.

El xuráu del premiu que va escoyer ente estos temes compónenlu'l director de la Radio Autonómica (RTPA) Javier Asenjo, l'escritor Adolfo Camilo Díaz, el filólogu Fernando Álvarez Balbuena -autor de lletres pa grupos como Llan de Cubel y Felpeyu-, el productor musical Sergio Rodríguez, titular de los estudios "Tutu" de Corvera, y el críticu musical Manuel Abad.