Cultura rechaza la reforma del Palaciu d'Omaña

El Conseyu de Patrimoniu Cultural d'Asturies refugó'l proyectu de rehabilitación del palaciu d'Omaña que presentare l'Ayuntamientu de Cangas del Narcea, que quier convertir l'edificiu en Casa de Cultura del Conceyu, pa lo que cuenta con perres de los fondos mineros. L'arquitectu Félix Gordillo foi quien s'encargó del proyectu pa restaurar el palaciu, que ye obra de sieglu XVI, pero'l proyectu que presentó nun-yos prestó un res a los representantes del Conseyu de Patrimoniu, que vieron que la restauración "come" l'edificiu orixinal, recreciéndolu muncho lo mesmo en planta que n'altura. La idega del arquitectu Gordillo pasa per mangar un teyáu nuevu a más altura que l'orixinal, colo que les dos torres identificatives del caserón quedaríen enxertes nun cuerpu de fachada que se vería cásique como ún bloque xigantescu, como se conoz en viendo les semeyes de la maqueta que puen vese nel web del Ayuntamientu. Cubrir el patiu central, mangar una galería de vantanes pa la parte d'atrás o cambiar la puerta d'agora por otra tamién de cristal son otros de los puntos que, pal Conseyu, vienen a desfigurar el palaciu orixinal tal y como se planteguen en proyectu.