Cultura quier facer daqué innovador na térmica d'Avilés

180.000 euros de presupuestu van ser colos que se licite en xunetu'l concursu pal proyectu d'aprovechamientu cultural de la Central Térmica de Valliniello (Avilés), fundada en 1957 y que va dexar de funcionar esti mesmu veranu.

La Conseyera de Cultura Ana Rosa Migoya visitó esta mañana les intalaciones de la térmica avilesina convidada pol conceyu y acompañada pol alcalde avilesín Santiago Rodríguez Vega pa conocer de primer mano les instalaciones d'esti edificiu clave del patrimoniu industrial asturianu esplicó que'l Principáu quier facer un concursu d'idees del que tien de salir, yá pa setiembre, el proyectu qu'apaute qué conteníos culturales va tener la central térmica. Esti proyectu va suponer l'apueste más fuerte de Cultura n'Avilés na llexislatura, y ello ye que se lleva más de dos años especulando con qué posibles conteníos va atechar l'edificiu de la central. Ana rosa Migoya tampoco nun aportó más lluz sobre esti particular, y namás dexó clares dos coordenaes nes que van asitiase les condiciones del concursu, que van ser la catalogación y mantenimientu de los elementos de la térmica que lo valgan y la entrada de conteníos culturales "rellacionaos col arte moderno" nel edificiu.

Xunta esto, Ana Rosa Migoya, que calificó l'edificiu de "impresionante" sorrayó que se pretende facer un equipamientu de cultura y d'ociu nel qu'entren instalaciones lúdiques, culturales y tamién comerciales. Sobre esti particular la titular de cultura dexó bien claro que se pretende facer daqué "distinto" a un muséu al usu, y dio anuncia de que tampoco nun se descarta la entrada d'empreses particulares a financiar l'equipamientu. De cualquier manera, pa saber más va haber qu'esperar hasta setiembre, cuando se conoza'l proyectu ganador del concursu, que la Conseyería quier que seya internacional.

La térmica de Valliniello inauguróse en 1957 como equipu encargáu d'apurrir la corriente, el vapor d'agua y la ventilación precises pal correctu funcionamientu de tola cabecera d'Ensidesa n'Avilés, siendo la primer instalación del xigante siderúrxicu del franquismu qu'echó a andar. Dempués de cerca de 50 años funcionamientu ininterrumpíu, la térmica de Valliniello ta a puntu d'echar el piesllu. Ello ye qu'Arcelor, l'heriede d'Ensidesa, yá nun precisa más del serviciu d'esta central, que pertenez alministrativamente a la Sociedá de Participaciones Industriales (SEPI).

El cambéu de gobiernu estatal de marzu pue acelerar los trámites y negociaciones pa que l'edificiu revierta al Principáu, acabando una historia bien llarga. Dende que se vio cerca la fecha del pieslle, la central convirtióse nun oxetu de deséu pal Conceyu y pa Cultura, sobremanera dende qu'Avilés perdió la carrera con Llangreu por atechar el Muséu de la Siderurxa d'Asturies. Un grupu d'inxenieros y técnicos plantearon facer nella un muséu de la enerxía, un sector industrial estratéxicu y con muncha historia n'Asturies, pero como la Conseyera planteó esta mañana "hai que ser más ambiciosos".