Cultura fai balance en positivo de les subvenciones a la recuperación de patrimoniu

La Conseyería de Cultura dio ayeri un informe sobre la evolución de les subvenciones que concede tolos años empobinaes a la restauración de bienes patrimoniales y monumentos n'Asturies. Acordies coles cuentes del Serviciu de Patrimoniu Históricu y Cultural, que dirixe Ignacio Alonso, la inversión en caltenimientu y restauración xubió un 22,5% nesta llexislatura, pasando de los 8,3 millones d'euros del 2004 a los 10,2 actuales. La xuba foi mayor proporcionalmente na estaya de subvenciones pa la restauración, onde se pasó de menos de 800.000 euros a 2.073.000 euros añales nel mesmu periodu. El director de Promoción Cultural, Carlos Madera, esplicó que la convocatoria pa restauraciones de bienes d'interés históricu xubió a 396.193 euros, mientres que la convocatoria pa restauraciones d'hórros, paneres y elementos etnográficos xubió 339.000 euros.

Madera apurrió datos sobre'l númberu d'horros, paneres, cabazos y molinos que s'iguaron nesta llexislatura con cargu a ayudes públiques, que foron un total de 954, con una xuba del so númberu a lo llargo de la llexislatura. Madera faló tamién de les inversiones directes de la Conseyería de Cultura nos horros de Sietes en Villaviciosa, y d'Espinareu, nel Infiestu y dio anuncia de la puesta en marcha d'un plan de restauración d'horros "d'altísimu interés históricu" nel conceyu de Quirós. Madera tamién se congració de la recuperación de molinos, que se remocicaron 33 nel añu 2006.

El director de Promoción Cultural y Política Llingüística enfotóse en que se vayan recuperar más elementos etnográficos nesti añu 2007 gracies a la xuba del presupuestu acutáu pa estes subvenciones y recordó-yos a particulares y conceyos que'l plazu pa presentar documentación pa estes convocatories ye'l 23 d'esti mes de febreru.