Cultura convoca los Premios Lliterarios 2015

|

A esceición del Alfonso Iglesias de cómic, que modifica les sos bases pa facilitar la presentación de trabayos. El plazu pa entregar les obres pa tolos gallardones fina’l 10 d’ochobre.

La Conseyería d’Educación, Cultura y Deporte, nuna resolución firmada pola conseyera anterior, Ana González, y espublizada güei nel Boletín Oficial del Principáu d’Asturies (BOPA), convoca los Premios Lliterarios 2015 “pa fomentar la creatividá lliteraria” en llingua asturiana y gallego-asturiano. Asina, queda abiertu’l plazu de presentación de trabayaos p’aspirar al XXXVI Premiu Xosefa Xovellanos de novela, al XXI Premiu Xuan María Acebal de poesía, al XXI Premiu Máximo Fuertes Acevedo d’ensayu y al VIII Premiu María Xosefa Canellada de lliteratura infantil y xuvenil.

Ayeri, tamién nel BOPA, diose a conocer una modificación de les bases del Premiu Alfonso Iglesias de cómic, que se convocará en feches próximes. Ésta consiste na posibilidá de presentar un proyeutu con, al menos, les primeres 15 fueyes en llugar de la historia completa. Mentes, el pagu de los 3.000 euros del gallardón va facese en dos partes: un 50 por cientu cuando se falle’l premiu y el restu cuando’l proyeutu tea fináu, siempre enantes de la fecha tope marcada na convocatoria.

Presentación d’orixinales nel Rexistru

El 10 d’ochobre ye’l día caberu pa entregar los orixinales nel Rexistru Xeneral Central de l’Alministración del Principáu d’Asturies en dos sobres zarraos nel que tien que dir el nome del premiu, el títulu de la obra y l’alcuñu del autor. Dientro han de dir los datos del mesmu y l’orixinal xunto con cuatro copies. Tolos trabayos han de ser inéditos.

Contador Estadistiques