Cuatro formaciones asturianes participen nel festival de bandes de gaites de Ribeseya

|

El Conceyu de Ribeseya entama esti sábadu’l III Festival de Bandes de Gaites Villa de Ribadesella 'Memorial Puru y Hugo'. Nél participen un total de cuatro formaciones del país.

El certame va tener llugar a partir de les 18.30 hores na Plaza Nueva y nél van participar la Banda Gaites Ribeseya, la Banda Gaites El Gumial (Ayer), la Banda Gaites Conceyu Siero y l’Agrupación Folclórica Picos de Europa (Cangues d’Onís). Na xornada tamién va entregase’l premiu del I Concursu Fotográficu ‘La Gaita y el Tambor Asturianos’ Memorial Hugo Fernández Prieto. Hai que destacar, que la organización del certame va collaborar cola Asociación Española contra el Cáncer ufriendo 2 euros por cada camiseta del festival que se merque, amás de ceder un espaciu a la ONG pa la colocación d’una mesa na que poder recibir aportaciones.

Yá de nueche, a les 23.30 hores, el gaiteru Borja Baragaño va presentar nel Chigre’l Corquiéu, xunto a Rubén Bada, el so discu ‘Onde yo me pueda dir’. Darréu la folixa va continuar nesti establecimientu rioseyanu emblemáticu.

Contador Estadistiques