El CSA La Semiente celebra un amagüestu en L'Entregu

Sidra del duernu y castañes, pero tamién música hasta bien entrada la nueche. El CSA La Semiente celebra esti vienres la seronda con un amagüestu en L'Entregu pa tolos vecinos.

L'actividá va principiar pela tarde, a les 17.30 hores, col repartu de castañes y sidra dulce nel parque La Llaguna, onde van asitiase un mayu tradicional y un llagar "pa que los neños esfruten mayando y conozan un poco de la nuesa cultura tradicional y d'ónde vien un productu tan natural y tan nuesu como ye la sidra". Tamién va haber xuegos tradicionales y música a cargu de Grupu Folcloricu El Castiellu, d'Olloniego.

Darréu la folixa va treslladase al campu de fútbol del Unión Deportivo El Corbero, onde va desendolcase un conciertu magar les 21 hores. Va abrir la nueche la Bandina L’Amagüestu, formación improvisada pa esta celebración, pa depués dar pasu al mecíu de rap, soul y funky de GuajaD. Una vegada finaes les actuaciones, va haber escenariu abiertu pa los presentes. Por último, va celebrase una pinchada de nome 'Nochnepiche Esbilla'. Los presentes van poder disfrutar de sidra L'Allume y cerveza Caleya.

Dende La Semiente agradecen la collaboración de tolos artistes, que participen de manera desinteresada, y al Corbero por ceder les sos instalaciones. Toles actividaes son de baldre.