Crítiques ecoloxistes al Plan Urbanísticu d'Uviéu

L'asociación ecoloxista Amigos de la Naturaleza Asturiana (ANA) que dirixe Carlos Lastra presentó unes alegaciones al Plan Xeneral d'Ordenación Urbana d'Uviéu. Ente les sos reclamaciones, el grupu conservacionista ofrez una solución alternativa al soterramientu de l'Autopista "Y" al pasu pela Ilesia de Santuyanu

El Plan Xeneral d'Ordenación Urbana d'Uviéu tien de tramitase otra vuelta. Esta ye la primer conclusión que saca ANA nes sos alegaciones al PXOU carbayón, en cuantes qu'entiende qu'al nun venir acompañáu d'estudiu d'impactu mediuambiental tol trámite que se lleva hasta agora ye nulu dafechu.

Con considerar nulo tolo que se lleva fecho, ANA condena delles de les actuaciones que vienen espeyaes en plan, entamando pela recalificación de grandes árees de suelu en San Cloyo, amenazando la zona del Torollu, o en Cualloto, que pasen de ser "non urbanizables" a tener categoría d'urbanizable. El documentu d'alegaciones sorraya qu'esta recalificación amás "incumple la normativa vixente en materia urbanística na mayoría de los suelos urbanizables de dambes zones" cosa que se conoz pola edificación de bloques d'hasta cinco altures prevista pa estos llugares, que son zona rural dafechu.

Xunta esto, l'alegación diz que'l númberu de viviendes previstes nesta actuación nun s'acompaña d'actuaciones pa da-yos serviciu en materia d'accesos rodaos o saneamientu. L'actuación na zona de la charca d'El Torollu, en San Cloyo considérase d'especialmente grave en cuantes que se pide pa esti llugar declaración de monumentu natural.

Dientro de lo que yá ye zona urbana, los ecoloxistes céntrense n'actuación na rodiada de la Ilesia de Santuyano, onde proponen, en cuenta de la previsión de soterrar la entrada de l'autopista pa llibrar a la ilesia más antigua d'Europa en funcionamientu de fumos y vibraciones, dexar la carretera al aire pero echala pa contra la fábrica d'armes, de manera que l'actual carril d'entrada a Uviéu quede vaciu y la carril de salida se convierta nel d'entrada, faciendo un carril nuevu de salida apegáu a la muria de la fábrica d'armes.

Más fuerte ye l'actuación que se propón cola plaza de Toros de Buenavista, que'l colectivu ecoloxista quier que se derribe pa facer nel sitiu que dexe llibre un parque más grande que'l qu'hai. ANA declara que nun ye a entender como ye que se diz en PXOU que merez "protección integral monumental".

Mientres la plaza Toros apaez como monumentu, ANA espresa con preocupación qu'elementos patrimoniales y espacios verdes de la ciudá como El Campillín apaecen con "protección parcial", y el mesmu Campu San Francisco tien "nivel de protección ensin especificar"