Crítiques del PP al Plan d'Emigración
9 Ochobre, 2004 por Redacción
- Inicie sesión o rexístrese pa espublizar comentarios
La diputada del PP Inmaculada González echó güei pel llabor del Gobiernu asturianu en materia d'emigración. González dixo que'l Plan d'Emigración del Executivu asturianu va con un añu de retrasu y acusó al Gobiernu asturianu de facer promeses que nun ta en condiciones de cumplir" a los emigrantes que quieren tornar a Asturies.
La diputada esplicó que les previsiones del Plan d'Emigración choquen cola realidá asturiana, y criticó les ayudes sanitaries a los que vuelven cuando los enfermos asturianos tienen d'aguantar llistes d'espera nin ufiertar puestos de trabayu a los emigrantes cuando vuelvan tando los índices de paru tan altos como tan n'Asturies.
La diputada echó pel plan d'Emigración por dir con retrasu y porque nun tien dimpuestu nengún tipu de control que garantice'l bon funcionamientu de lo que pon nel papel.
Por too ello, la diputada demandó que l'Axencia Asturiana de la Emigración pase a depender de Presidencia, colo que se quitaría de delantre un sueldu d'altu cargu y nun se tiraríen les perres. El mayor marafundiu del departamentu dependiente de la Conseyería d'Esteriores velu la diputada nos viaxes, condenando'l fechu de que los cargos directivos d'Esteriores sumen un total de 103 díes viaxando fuera d'Asturies. Según González "ta bien ser cosmopolita, pero non coles perres de toos".
Efrén d'Andrés
