Crisis nel Conseyu de Mediu Ambiente

Los representantes de los grupos ecoloxistes que participen en el Conseyu Rexonal de Mediu Ambiente pidiéron-y al Conseyeru de Mediu Ambiente del Principáu que faiga una convocatoria d'esti órganu primero de qu'acabe la llexislatura en cuantes qu'el Conseyu lleva mas de un añu ensin aconceyase.

Les organizaciones presentes nel Conseyu camienten que, a pesar de los asuntos tan graves qu'hubo esti añu en materia de mediu ambiente nun se convocare xunta d'esti muérganu nin se ficiere por pidir la opinión de les asociaciones ecoloxistes al través de nengún calce. Al paecer de les organizaciones ecoloxistes, nun ye de recibu que'l PSOE, que tanto defende la participación ciudadana na política y que pide la creación de Conseyos de Mediu Ambiente nos conceyos en que ye oposición depués nun tenga en cuenta la esistencia d'esti órganu qu'ellos mesmos crearon en 1.991.

El Conseyu Rexonal de Mediu Ambiente ye un órganu asesor
de la Conseyería de Mediu Ambiente en que participen, amás de los grupos ecoloxistes, con dos representantes, delles Conseyeríes, ayuntamientos, organizaciones empresariales, sindicatos, y la Universidá. Precisamente'l representante universitariu nel Conseyu, el caderalgu de bioloxía Ricardo Anadón dimitió va dos meses en medio de la crisis del Prestige, pola inoperancia d'esti órganu. Dende l'añu 2.000 tamién tan representaos la Federación de Montaña del Principáu y el Conseyu de la Mocedá.

Les organizaciones ecoloxistes dicen que nestos cuatro años de llexislatura el Conseyu aconceyó 3 veces, en cuenta de les 8 que tendríen de ser, yá que por llei diz que tien de convocase xunta cada seyes meses.