Créase un grupu de debate críticu col discursu asturianista

La pasada fin de selmana un grupu d'unes venti persones del ámbitu del asturianismu cultural aconceyó en Salas col envís de debater y reflexonar dende un puntu de vista críticu sobre cuestiones rellacionaes cola llingua, la identidá y el discursu asturianista. Siempre "con vocación constructiva y desvinculación de dogmes", dellos de los presentes mostráronse especialmente críticos col discursu de reivindicación cultural mayoritariu, representáu principalmente la Xunta pola Defensa de la Llingua, que xulguen tuteláu y reduccionista.

Durante tola selmana en círculos asturianistes comentóse enforma esta reunión que foi organizada cola mayor de les discreciones. Asturies.com faló con dos de los organizadores, Taresa Lorences y Ignaciu Iglesias, que comentaron la so visión del alcuentru y les sos perspectives pal futuru.

Taresa Lorences aclara en primer llugar que, a pesar de la rumoroloxía que circuló tola selmana, el conceyu nun taba organizáu por Lliberación, la organización política venceyada a IU, sinon por "un grupu de xente independiente que s'axuntó col envís de per un llau poner en contactu a xente que nun se ve tolos díes pa repensar l’asturianismu nun clima serenu onde tol mundu tuviere a gustu, y per otru entamar una reflexón critica sobre los presupuestos ideolóxicos y d’accion politica que vienen marcando l'asturianismu dende l'iniciu".

No que toca a los asuntos trataos, Lorences comenta que se "punxeron enriba la mesa temes como la cuestion de la identidá con propuestes crítiques pa la construcción d’una nueva visión de la identidá asturiana y del asturianismu" a lo que Lorences amestó que se partía nel debate de la esistencia nesti sen d'unos "presupuestos ideolóxicos qu’hai tres d’una asociación concreta, mui tutelada y que tien una visión reduccionista” qu'había que rebatir. Nesi mesmu sen, Ignaciu Iglesias apunta que "si por asturianismu entendemos una opción escluyente qu’implica fidelidá a determinaes instituciones y asociaciones como la Xunta y l'ALLA entendemos qu'esta ye una óptica negativa qu’hai que cambiar, porque al final ye la mesma que tenía'l PAS col so discursu de “los demás nun son asturianos”. Iglesias aclaria que "ye positiva la pertenecia a organizaciones asturianistes y partíos políticos d'estes ideoloxíes, pero nun ha ser requisitu obligatoriu pa ser asturianista""

La identidá centró bona parte del debate, qu'entamó'l vienres y acabó'l domingu, tratándose, ente otros temes, "la identificacion ente llingua y asturianidá analizando si los referentes d’esta identidá han ser los d’un muséu etnográficu o los d’una sociedá moderna" comenta Lorences, mentes qu'Iglesias apunta que "entiendo qu’haya xente que se defina mui bien colos referentes de la etnografia y la cultura tradicional, pero ye necesario incorporar a les señes d’identidá elementos mas modernos. Ye un debate dificil".


Otru de los aspectos trataos foron cuestiones de política actual como "la posibilidá o non de revisar el modelu clásicu de la oficialida, esplorando los derechos llinguisticos esistentes y la posibilidá qu’hai d’agotalos o facer usu d’ellos" anque Iglesias matiza que "nun vamos dar a entender que rebaxamos conteníos o que renunciamos a la oficialidá, pero ente que llega y non, hemos crear un marcu de respetu dientro del asturianismu". Entrambos coinciden na necesidá de salir del debate del posibilismu "por ser falsu".


Sicasí, Ignaciu iglesias insiste nel calter constructivu del alcuentru, afitando que "nun queremos dar tampoco la impresión de qu'en Salas se xuntaron cuatro a criticar, sinon a trabayar con intencion constructiva y desvinculacion de los dogmes, partiendo de qu'hai que cambiar les maneres de grupu zarráu y de consigna que manden nel asturianismu y facer un asturianismu mas seductor". Iglesias pon como exemplu de la so filosofía la necesidá "d’apoyar a cualquier asturianista que tea trabayando en cualquier ámbitu" lo que val, y cita como exemplu,"tanto pa Ramón d'Andrés como p'Ana Cano, xente que nel presente ta presente n'estremaes instituciones y a la qu'hai qu'apoyar lo mesmo que nel pasáu igual hebo qu'apoyar a xente como Antón García o al mesmu Xuan Xosé Sánchez Vicente en cuenta d'echalos abaxo por esi espíritu dogmáticu que tien l'asturianismu" mientres que Lorences faló de que ye preciso facer "un asturianismu más amable y con sentíu del humor".
Inaciu Iglesias confirmó qu'esti debate, del que se va dir informando a los medios, va tener la so continuidá nun prósimu conceyu en Mieres que va organizar un grupu de persones formáu por él mesmu, Pilar Fernández, Taresa Lorences, Henrique Facuriella, Ismael Arias y Vanesa Rodríguez.