Cova Tomé axunta n'Avilés con profesionales de la industria cultural

La diputada de Podemos, acompañada por Laura Tuero y Xune Elipe, quier afondar en cuestiones trataes nes comparecencies informatives sobre'l proyeutu de Presupuestos.

Cova Tomé va aconceyar mañana pela mañana n'Avilés con Xicu Ariza, espertu n'idustries culturales y creatives, y miembros del coleutivu Lluces (Asociación de Creadores Audiovisuales Independientes d'Asturies), que dieron la so visión na Xunta Xeneral na sesión del pasáu día 11 –Marcos Martínez Merino actúó como representante del coleutivu–, amás de con Elisabeth Montequín, miembru del grupu musical 6 Riales. Trés visiones a les que se va incorporar tamién la del propiu Elipe, qu'acude nesti casu como profesional del sector.

El cantante de Dixebra, presente nes negociaciones presupuestaries, declaró esta mañana nel alderique del programa de RPA 'Asturias al día' dirixíu por Roberto Pato, nel que participó xunto con Inaciu Iglesias, María Esther García López y el redautor d'Asturies.com, Pablo R. Guardado, que les cuentes de Cultura nun-y satisfacíen. La intención de Podemos ye tratar d'ameyoralu al traviés d'enmiendes, pa lo que quieren conocer de primer mano les necesidaes de la industria cultural, les inquietúes que tienen nesti momentu y les sos propuestes.

Nel centru de la imaxe, Tomé, con Tuero y Elipe a la so izquierda, el 2 d'avientu, cuando xunto con compañeros del partíu anunció'l votu favoratible a los Presupuestos. Semeya d'Alisa Guerrero.