Corvera entama un taller d’historia d’Asturies

‘Una pregunta pa cada historia’ ye’l nome del taller de baldre pa xente adulto qu’entama’l Conceyu de Corvera con aniciu previstu pa esti xueves. El Reinu d’Asturies, la conformación del territoriu asturianu o los oríxenes de la Xunta Xeneral, dalgunos de los temes a tratar nesti cursu.

Rafael Rodríguez Valdés, responsable de la Casa de la Llingua-Serviciu de Normalización Llingüística de Corvera, amás de Llicenciáu n’Historia pola Universidá d'Uviéu y Postgráu n'Archivística pola UNED, va encargase de poner les clases d’esti taller, nel que tamién van participar con charres temátiques trés historiadores especialistes na dómina medieval y moderna, casu de Xuan F. Bas Costales, Jesús Fernández Fernández y Nicolás Alonso Rodríguez. “‘Una pregunta pa cada historia’ busca introducir na Historia d'Asturies a les persones interesaes, siempres dende un planteamientu abiertu y rigorosu al empar col que s'acerca a cuestiones como'l Reinu d'Asturies, la cultura na Edá Media Asturiano-lleonesa, la conformación del territoriu asturianu, les condiciones de vida del campesináu, el papel de la Ilesia, los oríxenes del Principáu y la Xunta Xeneral, ente otres cuestiones más”, espliquen dende’l Conceyu de Corvera.

Les clases van dar comienzu mañana, n’horariu de 18 a 20 hores, nel Aula 2 del Centru Sociocultural de Les Vegues. El taller siempre va dase de xueves, con un llargor de 14 hores llectives. Les persones interesaes en matriculase pueden facelo hasta mañana nel Centru Tomás y Valiente o nel Centru Sociocultural de Les Vegues.