Convocáu'l XXXI Premiu Teodoro Cuesta de Poesía

|
Teodoro Cuesta

El plazu pa la entrega de poemarios pa esti concursu del Conceyu de Mieres, un máximu de 2 por persona, fina'l 4 de payares.

El prestixosu Premiu Teodoro Cuesta de Poesía algama la so trentena primer edición. Con una recompensa de 4.000 euros pal ganadores, los meyores poetes de la lliteratura asturiana d'anguaño apaecen nel palmarés del gallardón, como Berta Piñán, Lourdes Álvarez, Xuan Bello, Vanessa Gutiérrez, Ángeles Carbajal o Pablo Texón, ente otros munchos.

La convocatoria del concursu asoleyóse'l día 13 nel Boletín Oficial del Principáu d'Asturies (BOPA), abriendo un plazu de 15 díes hábiles dende entós, que se cumple'l 4 de payares. Los autores interesaos han de presentar les sos creaciones –un máximu de 2 por persona–, orixinales y inédites en sobre zarraos con plica colos datos y una breve biografía, per corréu postal a la Casa Cultura o al traviés del Rexistru del Conceyu.

El fallu del xuráu, formáu por persones nombraes nel ámbitu de la lliteratura asturiana, daráse a conocer nun periodu máximu d'un mes. El ganador de la edición pasada foi'l ribeseyanu Milio Ureta por 'Pexe les manes'.

Contador Estadistiques