Constituyóse la Xunta Xeneral que va tratar la reforma del Estatutu d’Autonomía

La Xunta Xeneral del Principáu d'Asturies constituyóse ayeri xueves pa la so VII llexislatura en democracia con pocos cambeos respective a l'anterior. La socialista María Jesús Álvarez va repitir al frente de la cámara por tercer llexislatura gracies a los 21 votos de los escaños de la FSA y los 4 d'IX-BA-LV, un consensu nel votu ente les dos formaciones d'izquierda qu'asitió como primer vicepresidente de la mesa de la Xunta Xeneral al diputáu Aurelio Martín. El PP punxo a los diputaos Pelayo Roces y Fernando Goñi na mesa de la cámara colos cargos de vicepresidente y secretariu segundos, mientres que la secretaria primera va ser Mercedes Álvarez González.

Na so primera intervención como presidenta na llexislatura, Álvarez asitió como prioridá la reforma del Estatutu d'Autonomía, que s'enfotó en que puea facese "col mayor consensu posible".

De los 45 diputaos, namás Javier Valledor emplegó l'asturianu pa prometer el cargu, emplegando la fórmula "faigo promesa". Ello foi que tolos diputaos de PSOE y IX-BA-LV prometieron el cargu, mientres que los 18 del PP optaron por xurar. Los dos testos disponibles pa facer l'actu solemne foron la Constitución Española y l'Estatutu d'Autonomía.