Conseyu de Gobiernu podría aprobar espedientes toponímicos enantes de les vacaciones

El balance oficial de los trés primeros años de Gobiernu ente FSA y IX-BA incluye nes sos valoraciones y propósitos pal añu que queda per delantre enantes de les elecciones un compromisu esplícitu de cumplimientu del plan de Normalización del asturianu con especial atención a la toponimia.

El documentu de valoración fala de da-y cumplimientu al plan nel 2007, con especial atención a la toponimia. Nesti sentíu, y desque l'aprobación d'espedientes toponímicos tea de fechu allancada dende l'aprobación de los últimos espedientes yá nel añu 2005, el documentu fala de que tolos espedientes de los conceyos en que ta trabayándose "van tramitase pa la so aprobación y oficialización en Conseyu de Gobiernu, cola renovación progresiva de la rotulación de las víes públiques, carreteres, planos y mapes nel marcu de los créditos presupuestarios que s'apauten en cada exerciciu".

Teniendo en cuenta que namás queden cuatro sesiones de Conseyu de Gobiernu d'equí al periodu vacacional, ye difícil que los 17 espedientes yá aprobaos a nivel de los sos respectivos conceyos puean recibier el preste definitivu nesi tiempu, anque fontes allegaes al Conseyu de Gobiernu consultaes por Asturies.com aseguraron qu'esiste la voluntá de que a lo menos parte d'ellos puean aprobase enantes del periodu vacacional qu'entama'l 4 d'agostu. En cualquier casu, la celebración esta selmana del Conseyu de Gobiernu en Ribeseya nun paez el meyor escenariu pa que se recupere la iniciativa en materia de toponimia, colo qu'habría d'esperar como mínimo hasta'l 20 de xunetu.