Condena a la quema de residuos

La Coordinadora Ecoloxista llamenta que les instituciones asturianes nun participaron de la convocatoria y fai un llamáu nes conclusiones a que nun se construya la incineradora de Serín

Tres de trés díes de debates, nos que se faló de la xestión de residuos nes sociedaes contemporánees, la Coordinadora Ecoloxista d'Asturies, entidá organizadora de los prestixosos alcuentros sobre reciclaxe "amantes de la basura" que se celebraron por primer vegada n'Asturies ta acabante d'asoleyar les conclusiones de los alcuentros. Más de 60 persones participaron nes xornaes, a les que taben convidaos los 78 Conceyos d'Asturies pero a les que namás asistió'l conceyal de Mediu Ambiente d'Avilés. A la falta de presencia de les alministraciones más interesaes nos temes a tratar los organizadores amiesten tamién la falta d'educadores participando d'unes xornaes nes que podíen deprender información mui interesante.


Les conclusiones del alcuentru van precedíes tamién d'una serie de propuestes específiques p'Asturies, destacando nelles l'oxetivu doble que se propón de menguar la xeneración de residuos per una parte y algamar, per otra, una tasa del 60% de recuperación de los mesmos. Pa ello propónse una riestra de midíes entamando pola recoyida selectivo de los residuos orgánicos, que son el 40% del total, pa sacar d'ello metanu y compost. Ello choca cola intención esistente d'instalar una incineradora en Serín con capacidá pa 400.000 tonelaes, un proyectu que los participantes nel alcuentru ven que ye una esaxeración tratándose d'un área de 15 kilómetros de radiu nel que viven 600.000 persones.

D'otra manera, los participantes nel alcuentru, que ficieron un apueste claru pola fiscalización de la basura, camienten que ye precisa una xuba de les tases por depósitu en vertederu, qu'anguaño son d'ocho euros por tonelada, un coste demasiao baratu que nun llama a los Conceyos a invertir en polítiques efectives de reciclaxe porque tirar en vertederu sal-yos más barato, proponiéndose xubiles hasta 50 euro


Nun marcu más xeneral, les conclusiones del alcuentru proponen un decálogu de midíes qu'afecten a tola cadena de xeneración y tratamientu de residuos, lo mesmo qu'a la investigación y desarrollu nesta materia. Una d'estes midíes ye l'adopción d'una ética de producción llimpia que desanicie los productos tóxicos. Esta ética tendría de treslladase a les canales de distribución, proponiéndose dende l'alministración cartafueyos apautando'l tratamientu que se-yos tien de dar a productos como les cubiertes de coche o materiales de construcción en dexando de ser útiles.

La materia orgánico apaez como una de les preocupaciones más importantes, pidiéndose que la Llei de Vertederos prohiba tirar materia orgánico ensin tratalo primero, marcando un oxetivu xeneral pal estáu de tratamientu del 50% d'esta materia d'equí al añu 2006. En cuantes a lo tocante a la parte del reciclao que se fai nos domicilios particulares, les conclusiones del alcuentru destaquen que'l modelu actual de recoyida d'envases ta demostrando que nun funciona y que nun se pasa de tases de reciclao del 15%, proponiéndose sistemes alternativos "puerta a puerta" y duales que, según esperiencies de determinaos conceyos de Cataluña y del Norte d'Italia, permiten llegar al 50-75%.

La incineración, ún de los temes clave a lo llargo del debate, condénase esplícitamente nes conclusiones. Los argumentos pa ello son que supón un altísimu coste y que la quema indiscriminada de residuos piérdese una gran cantidá de materiales que sedríen reutilizables, amás de suponer un dañu a la salú. Dientro del tema de la incineración, faise una crítica mui fuerte a lo que se conoz como "incineración encubierto" que consiste na quema de residuos en fábriques de cementu, fornos altos, centrales térmiques y otres industries.


Los "amantes de la basura" tamién ven que ye precisa una mayor tresparencia del procesu de xestión, que ven necesario que nun quede en manes de grandes compañíes, emponderándose mayor xeneración d'emplegu y implicación nos oxetivos de les empreses d'economía social.