Concursu lliterariu en Cangas del Narcea

La conceyalía de Cultura del Ayuntamientu de Cangas convoca'l segundu concursu de relatos curtios en llingua asturiana "Ayuntamientu de Cangas del Narcea" al que puen presentar trabayos tolos mayores de 16 años. Cada participante namás pue presentar un orixinal, que tien de tener ente cinco y diez páxines de tema llibre. El plazu de presentación de trabayos acaba'l 31 d'ochobre, teniendo d'unviase los mesmos a la Oficina d'Información Xuvenil de Cangas del Narcea. Ye preciso que'l sobre vaya ensin remite y qu'incluya, xunta tres copies del cuentu, un sobre aparte colos datos del autor. El xuráu, presidíu pola Conceyala de Cultura, van facelu profesores d'asturianu y u miembru de l'Academia de la Llingua Asturiana. El concursu cuenta con una dotación económica bien curiosa, llevando'l ganador premiu de 600 euros, 300 el finalista y 180 el tercer clasificáu.

La primer edición del concursu, que se celebró l'otru añu, ganóla l'escritor de Xixón José Luis Rendueles cola obra Branu enfermu. Esti autor, que yá venía de ganar el "Xuan María Acebal" de poesía y el "Asturias Joven" que convoca la Conseyería de Cultura, tien en castellano dos llibros de poesía y otru de cuentos, mientres que la so producción queda arrequexada de momentu al volume Cuentos chinos, anque tien otru llibru pa sacar d'equí a poco. El palmarés del añu pasáu completáronlu Llucía Fernández Marqués (Xixón, 1974) pola obra La Velea y Remedios Menéndez col cuentuA la xente que nun deixou que murriera esta guapa fala. Da la casualidá de que la tercer clasificada, anque trabaya en Madrid, ye fía de padres de Cangas, siendo la única representante del llugar y la única qu'emplegó l'asturianu occidental ente los ganadores de la primer edición.