Compromisu llama a la so militancia a participar nel alcuentru de Podemos del sábadu

Podemos Asturies celebra'l sábadu un alcuentru ciudadanu en Xixón pa la ellaboración del programa eleutoral. Compromisu por Asturies llama a la so militancia a participar nél.

"Creyemos que ye’l momentu de trabayar pa recostruyir el país; pa da-y soberanía a los asturianos y asturianes; pa facer un país más xustu socialmente; pa qu'Asturies seya suxetu políticu dientru de l’Estáu; pa que la oficialidá del asturianu seya un derechu y una realidá irrenunciable; pa defender la nuestra tierra, el nuestru aire y les nuestres agües. Queremos un país pa vivir y trabayar; pa ello ye necesario afitar un proyeutu políticu que seya quien a valtiar el réxime del PPSOE y facer el cambiu necesariu", apunten dende la federación de partíos y independientes, que convoca tamién pa la cita del sábadu a les 10 hores nel Centru Municipal Integráu Pumarín-Xixón Sur a tola "izquierda asturiana y a la ciudadanía en xeneral".

Nesti alcuentru ciudadanu, que va allargase hasta les 19 hores, van entamase delles meses de trabayu pa facer una analís de la realidá y desendolcar el programa eleutoral de Podemos Asturies pa les eleiciones del 24 de mayu. D'igual forma, Compromisu anima a la so militancia a participar nes candidatures de xunidá popular que s'entamen nos sos conceyos.