Comisiones Obreres píde-y a DuPont que cambie'l so modelu de rellaciones llaborales

Los principales sindicatos asturianos congraciáronse de l'anuncia d'inversiones nueves de la empresa Dupont n'Asturies, que va reforzar la producción de freba nomex na so fábrica de Tamón y que va crear alredor de 50 puestos de trabayu nuevos, anque CC.OO. fizo un llamáu a la empresa a camudar el so modelu de rellaciones llaborales.

Dende UXT emponderose'l calter "d'alta tecnoloxía" de la fábrica de Tamón. La central sindical enfotóse en que les fábriques nueves de Tamón van contribuyir muncho "a reactivar económicamente Asturies". La otra central sindical mayoritaria, CC.OO. tamién recibió con contentu l'anuncia de DuPont, pero'l so secretariu Antonio Pino llamentó les "carencies" de tipu social qu'entovía presenta la empresa "dempués de la cantidá de dineru público que recibió". El secretariu del sindicatu CC.OO esixó que DuPont "dexe la so política escurantista y que llevante'l vetu a los sindicatos qu'esiste na so fábrica". P'Antonio Pino, el modelu de rellaciones llaborales de DuPont "nun se da yá n'España nin n'Europa". Pino tampoco entiende la trescendencia que se-y dio a l'anuncia de la multinacional química, pola que'l mesmu Presidente Álvarez Areces interrumpió les sos vacaciones, cuando namás implica la creación de 50 puestos de trabayu. De facese asina con tol mundu, "a IKEA tendría de facése-y un monumentu polos cientos d'empleos que creó n'Asturies" declaró Pino.

Con más de 1.000 trabayadores en plantiya, la fábrica asturiana de DuPont ye ún de los centros de trabayu de mayor volume onde nun hai presencia sindical. El secretariu de CC.OO. Antonio Pino denunciare delles vegaes que la empresa esbilla a los sos trabayadores nel procesu de selección pa evitar la sindicación.