La Comisión Europea refuga les alegaciones del Ministeriu de Facienda y reclama la devolución de la totalidá de les ayudes a l'ampliación d'El Musel

|

Les alegaciones del Ministeriu de Facienda al informe de la OLAF sobre les obres d’ampliación d'El Musel nun convencieron a la Comisión Europea. L’organismu comunitariu reclama la devolución de los 198 millones d’euros yá entregaos al Estáu y reprocha la so falta d'aición tres conocer el documentu.

La Xunión Europea (XE) comunicó la selmana pasada al ministeriu’l refugu de les sos alegaciones y la so postura de retirar la cuantía de les ayudes, amás de frenar los 49.500.000 euros reteníos por mor de l’apertura d’esta investigación tres una denuncia d’Andecha Astur el 8 de marzu del 2009 énte la Oficina Europea de Llucha contra’l Fraude (OLAF) al traviés de Mikel Irujo (Eusko Alkartasuna), eurodiputáu de la coalición Europa de los Pueblos –de la que formaba parte la organización– por irregularidaes na execución del proyeutu d’ampliación d’El Musel. En total, seríen casi 250 millones d’euros les perres que se perderíen de fondos europeos pola xestión d’unos trabayos que finaron con un sobrecostu amplísimu y que tuvieron una oposición importante ente la población. L’Estáu español cuenta agora con dos meses pa señalar si ta conforme cola decisión o si acude a la vía xudicial, como s’espera.

Dende Andecha Astur señalen que la decisión de la Comisión Europea “supón un recordatoriu de qu’acullá de la miseria a la que mos llevaron les polítiques de corrupción instauraes nel nuesu país, esisten unos mecanismos llegales a nivel de la XE que nun toleren la corrupción y énte los qu’hai que responder de forma efeutiva cuandu se deteuta un fraude”, y esperen que la sanción “tea les obligaes repercusiones llegales”. Asina, cuenten con que los responsables d’esta situación tengan “que responder énte la xusticia, y qu’ésta actúe cola mayor dilixencia y durez, investigando fasta’l final toles implicaciones y determinando fasta la postrera de les responsabilidaes, por más que la realidá que carecemos  n’Asturies, col Casu Riopedre, Niemeyer, etc., fáiganmos ser pesimistes”. D’igual forma, los nacionalistes avisen del so propósitu de siguir cola so llucha “contra la corrupción y les redes mafioso-clientelares qu’afueguen económica y socialmente Asturies”.

Contador Estadistiques