Colesterol a l’asturiana

Un estudiu xenéticu fechu sobre 300 pacientes asturianos con tases de colesterol altes fizo rescamplar la existencia de delles mutaciones característiques que nun se dan n'enfermos d'otres comunidaes, según esplicó'l director xeneral de Prestaciones Sanitaries, José Ramón Riera

La hipercolesterolemia familiar ye un mal hereditariu que vien d'un defectu xenéticu que provoca la xuba del nivel de colesterol en sangre, pudiendo provocar muerte por infartu y otres enfermedaes cardiovasculares incluso en xente mozo.

El siguimientu sobre esti grupu de pacientes entamó nel añu 2005 en tol estáu, descubriéndose gracies al mesmu la existencia d'un altu númberu de mutaciones específiques de la hipercolesterolemia que nun se dan n'otros llugares y que multipliquen por cuatro la tasa de mutaciones específiques de países como Holanda, que tienen mui avanzáu l'estudiu d'esti mal. El xefe de Prestaciones Sanitaries José Ramón Riera, sorrayó qu'estes mutaciones tienen implicaciones antropolóxiques de gran interés y rellacionó l'apaición de les mesmes col aisllamientu de la población asturiana en sieglos pasaos. Dende'l puntu de vista sanitariu, anque entovía nun hai conclusiones, la detección xenética de la hipercolesterolemia ye qu'ayuda a prevenir les enfermedaes cardiovasculares, que son la primer causa de muerte n'Asturies.