Clint Eastwood protagoniza la cartelera nos cines asturianos

Esta selmana estrénase nes carteleres del nuesu país
"Cartas desde Iwo
Jima", últimu trabayu como director de Clint Eastwood y
nominada nes categories de "Meyor pelicula", "Meyor guión
orixinal" y "Meyor dirección" nos premios Oscar.
Depués de "Banderas de nuestros
padres", na qu'Eastwood ufierta la visión dende'l bandu
norteamericanu de la conocida batalla de la islla d'Iwo Jima na Segunda
Guerra Mundial, agora quier dar la visión dende'l bandu xaponés.
El títulu del film fai referencia a los varios cientos de cartes de
soldaos xaponeses desenterraes del suelu de la islla, siendo un testimoniu de
priemer manu d'aquel xabaz enfrentamientu y que sirvió de base pal
guión de la película.

La pelicula alemana "La vida
de los otros" ye otra de les estrenes de la selmana . Nella'l director
Florian Henckel von Donnersmarck sitúanos na Alemaña nel
añu 1984 y narra la historia d'un axente de la Stasi, la policía
secreta de la estinta República Democrática Alemana (RDA),
encargáu de vixilar a una pareya d'artistes polos qu'a la fin nun puede
evitar sentir simpatía. Ganadora de la última edición de
los Premios del Cine Européu, opta al Oscar a la "meyor pelicula de
llingua non inglesa". Mas estrenes de la selmana na nuesa
cartelera.