Ciudadanos desmárcase de les postures más radicales del PP, pero nun defende la oficialidá

|
Nicanor García Fernández

Nicanor García Fernández adelantó les aportaciones que va facer Ciudadanos al borrador del dictame de la Comisión Especial d’Estudiu sobre'l Réxime de Proteición y Promoción del Asturianu. Pese a confirmase contrariu a la equiparación de derechos y axuste al marcu constitucional que supón la oficialidá, el diputáu calificó al PP como un partíu "contra l'asturianu".

Nuna intervención en rueda de prensa señaló, ensin citala direutamente, que la formación liderada por Mercedes Fernández ta “contra l’asturianu” y amosó’l so sofitu a les ordenances municipales, remitiéndoles siempre a la Llei d’Usu y Promoción del Asturianu ,“que baxo’l nuesu puntu de vista contién tolos instrumentos llegales al algame pa poder preservar y desarrollar la llingua”, apuntando que “nun s’utilizaron suficientemente” hasta la fecha. Darréu, y falando del PP, recomendó “a dalgunos partíos políticos que tán en contra del bable que lleeran esa llei nos sos diferente apartaos, que foi promulgada pol Gobiernu de Sergio Marqués”.

Citó “el derechu de los ayuntamientos a preservar l’usu llingüísticu del bable, que lo contempla la llei; la difusión de les espublizaciones; el derechu de tolos ciudadanos asturianos a espresase oralmente o por escrito; el posible méritu que pue tener el bable/asturianu nos concursos y oposiciones…”. “Afita un marcu xurídicu y llegal dende’l nuesu puntu de vista suficiente y más que suficiente pa preservar l’asturianu y desarrollar el so usu”, afirmó García Fernández que tamién fixo referencia a la necesidá de la especialidá docente pa da-yos estabilidá a los profesores d'asturianu y a la necesidá d'apurrir medios afayadizos a l'Academia de la Llingua Asturiana.

Estes declaraciones del voceru de Ciudadanos na Xunta Xeneral indiquen que la formación naranxa nun entra de momentu a competir col PP pol votu de los sectores ultres más radicales que defenden valtar el procesu de normalización del asturianu entamáu hai 30 años y que ye la posición de los dirixentes populares actuales, pero tampoco se posiciona a favor de la equiparación de derechos y axuste al marcu constitucional que supón la cooficialidá.

Nun ve demanda prioritaria

“El bable/asturianu ye una llingua y, poro, hai que preservala, difundir la so promoción y usu, y tenemos el derechu y el deber de fomentar dientro de la comunidá autónoma que sía una llingua normalmente utilizada polos ciudadanos”, destacó García Fernández que, sicasí, considera que la oficialidá nun ye una aspiración mayoritaria. “Nun hai estadístiques que lo demuestren asina. Creemos que ye una aspiración d’un sector de la población importante, pero minoritariu”, añadió.

Poro, los motivos qu’alega’l diputáu pa nun tar d’alcuerdu na implantación de la oficialidá son de tipu “económicu, yá que la mesma Academia de la Llingua reconoz un gastu de 20 millones d’euros añales y ye la cifra más baxa, porque hai espertos que la cifren en 50 millones y otros muncho más; nun ye una demanda prioritaria pa la sociedá asturiana; y una cuestión social, que sería introducir un alderique políticu y polémicu sobre dalgo sobre lo qu’anguaño nun hai controversia”.

Contador Estadistiques