Chascu n'Aveiro

A primeros d'esti mes, esta sección daba anuncia de la que diba ser la primer suelta grande de páxaros engalipotaios pol fuel del Prestige. Sicasí, lo que yera una bona anuncia, acabó nun desastre que tampoco nun vamos dexar de contar. Catorce araos yeren los afortunaos supervivientes de la marea negra que diben recuperar la llibertá nes playes portugueses d'Aveiro el día 7 de febreru tres un llargu procesu de recuperación en centru de San Xuan de Nieva. Representantes asturianos, gallegos, portugueses y hasta les cámares de la TV lusa taben ellí pa celebrar y dar constancia del actu, pero l'allegría tornó en chascu en soltando a los páxaros, que, según llegaben a la oriella, reculaben fríos y calaos d'agua. Por dalguna razón inesplicable naquel momentu, los catorce araos nun yeren quien criar la grasa que los caltién llibres del agua y del frío, colo que nun aguantaron el primer contactu col mediu natural. Siendo difícil volver con ellos p'Asturies, decidiose como solución d'urxencia llevalos pal centru de recuperación de la Xunta de Galicia en Campiño (Pontevedra), que de mano montaren voluntariosamericanos del IFAW. Namás llegar a Campiño, a los catorce araos asturianos colgáron-yos la etiqueta de "páxaros puercos" ello ye, que d'alcuerdu al criteriu del centru de Campiño, los araos nun taben en condiciones de soltase. La pulpera que garraren n'Aveiro foi fatal pa seyes páxaros, qu'hubo que sacrificar, una midida que namás se toma en casos d'estrema gravedá. Otros tres tuvieron más suerte, y agora yá tan llibres, mientres que los demás siguen a tratamientu a día de güei.El fracasu de los araos llevó a los responsables asturianos a recapacitar sobre los fallos qu'había en procesu de tratamientu,llegándose a delles conclusiones que tendrán de meyorar el procesu de recuperación Aparte de que van facese cambeos importantes nes instalaciones de San Xuan de Nieva, onde van ponese piscines de tratamientu meyores de les qu'hai, decidiose tamién, como demandaben los representantes de la Coordinadora Ornitolóxica d'Asturies, que los encargaos de San Xuan de Nieva pasaren unos díes en Campiño estudiando'l métodu de trabayu que tienen ellí. El casu ye deprender de los fallos.