Chamorro repite como ganador del VIII Concursu Semeyes de la revista La Sidra

'Pecado original', d'Óscar Chamorro, ganó'l VIII Concursu de Semeyes La Sidra. El fotógrafu xixonés yá llevara'l gallardón l'añu pasáu con 'Llabores d'embotellar'.

138 persones de 12 naciones presentaron a esti concursu sidreru un total de 362 trabayos que valoró un xuráu compuestu por Marcos León, fotoperiodista del diariu 'La Nueva España'; Julia Pereda, Llicenciada n’Historia del Arte y asistente de direición de la Galería Viki Blanco; el fotográfu artísticu García de Marina; Carlos Manuel López 'Camala'; y Jerome Muñoz, direutor del Centru Integráu de Comunicación, Imaxe y Soníu de Llangréu, qu'actuó como presidente. Finalmente, la semeya escoyida como ganadora foi la nomada 'Pecado original', de Chamorro, que lleva como premiu 700 euros y llibros valoraos n'otros 100.

Tamién algamaron recompensa el vascu Carlos de Cos (primer accésit por 'Begiratzen') y l'entreguín José Manuel Parapar (segundu accésit por 'Cualquier momento es bueno), que reciben caún 50 euros y un llote de productos sidreros. De Cos, mentes, tamién llevó'l 'Premiu Especial Sidra JR', valoráu en dos caxes de sidra JR Etiqueta Negra, con 'Kortxoa'. El xuráu del VIII Concursu de Semeyes La Sidra fixo tamién una esbilla de les venti creaciones que van formar parte de la esposición itinerante que va tener como primer parada la xixonesa sidrería La Galana a finales de mes.