Cenera reconoz a l'ALLA na Fiesta de la Serondaya

L'Asociación Cultural Serondaya entrega a la institución el Premiu de la Cultura 2003 y entama un amagüestu, una esfueya y conciertos.

Cenera celebra la llegada de la seronda con una fiesta alredor de les castañes, la mazana y el maíz. Vive esta fin de selmana la Fiesta de la Serondaya nuna gran carpa instalada nel llugar y autocares especiales que xunen el pueblu con Mieres.

Chus Pedro va lleer el pregón a les 20 hores d'esta tarde, pa después siguir cola entrega del Premiu de la Cultura 2003 a l'Academia de la Llingua Asturiana (ALLA) "pol so ponderatible, imprescindible y persistente trabayu en defensa de la nuesa llingua asturiana, patrimoniu milenariu y herencia cultural del nuesu pueblu, y polos sos tremendos trabayos de proteición y actualización, d'enseñanza y espardimientu, y poles múltiples investigaciones feches a lo llargo de cincuenta y trés años, asin como pol papel tutelar de los derechos llingüísticos de los asturianos. Nada nun conforma la cultura d'un pueblu más que la so llingua, asina que naide contribúi más al espardimientu de la cultura d'un pueblu que'l que protexe y defende la so llingua".

L'actu va completase cola concesión de los premios del VII Concursu de Fotografíes de Serondaya 2023. Va zarrar la primer xornada de la folixa un conciertu de Skama la Rede programáu pa les 22 hores.

Mañana, cuatro grupos

La xornada de mañana va arrancar a les 10 hores cola I Carrera Minera Monte Llosorio y actividaes pa neñes y neños. La entrega del bollu preñáu a los socios de Serondaya va facese a les 17 hores, pa siguir con un amagüestu y esfueya animaos pol Grupu Ruxidera.

El día va pesllase con cuatro actuaciones. Van pasar pel escenariu de la carpa Los Gascones (19 hores), Los Llerones (20 hores), Ilustres Patilludos (22 hores) y La Tarrancha (00 hores).

El domingu al meudía la Banda de Gaites de Mieres va animar dende les 13 hores la sesión vermú. Los socios van celebrar una xinta d'hermanancia a les 15 hores y a les 17 va tocar Javier Valdés col so acordión.

Na imaxe, escenariu de la folixa momentos enantes de la inauguración y pregón. Semeya de Skama la Rede.