Celébrase esti llunes el segundu xuiciu contra Cándido y Morala

Los dos dirixentes de la Corriente Sindical d'Izquierdes Juan Manuel Martínez Morala y Cándido González Carnero, enfréntense mañana al segundu xuiciu en que van tener que responder poles acusaciones d'estrozos causaos nes movilizaciones de Naval Xixón . Dempués del primer xuiciu previstu pal 30 de xineru, nel que'l fiscal caltuvo la petición de 4 años pol estrozu d'una cámara de videu de control del tráficu, nesta segunda vista, el fiscal pide dos años y mediu de cárcele pa los sindicalistes pola quema d'una furgoneta na vía pública.

Los sindicalistes, que defenden la so inocencia y afirmen ser "víctimes d'un montaxe policial y políticu qu'intenta criminalizar les protestes llaborales y favorecer el pieslle del astilleru pa construyir edificios en primera llinia de costa", punxeren la selmana pasada una denuncia contra ún de los policíes que declararen na primer vista por dar testimoniu en falso.
Los dos sindicalistes identificaron al axente de policía denunciáu, que declarare nun conocelos más que polos fechos que se xulgaben, como "infiltráu" en manifestaciones antiglobalización celebraes nel añu 2001, apurriendo como preba gráfica dos semeyes nes que'l supuestu axente de policía apaez retratáu con ellos nes manifestaciones contra'l cume del Bancu Mundial en Barcelona, el 24 de xunu del 2001. Cándido y Morala aseguren qu'esta persona participó en reuniones del so sindicatu y que viaxó con ellos nel autocar que punxere la CSI pa participar naquelles protestes, mandándose en tou momentu por una actitú "radical y violenta".

Dempués de la celebración de la primer vista, a la qu'asistieron más de mil persones a la puerta de los xulgaos pa manifestar la so solidaridá colos sindicalistes, ye d'esperar que la vista d'esti llunes, qu'entama a les 9,30 nos xulgaos del Natahoyo de Xixón, vuelva a ser multitudinaria. La CSI fexo un llamáu a tolos sos militantes y simpatizantes a acudir a los xulgaos, al que s'amestaron bien d'organizaciones polítiques culturales y sindicales.