Cayida llibre del dólar

La divisa norteamerica ta perdiendo posiciones contra un euru que tien más fuercia cada vegada. El mieu a nuevos ataques terroristes nos Estaos Xuníos xunta les duldes macroeconómiques ta poniendo munches torgues a la recuperanza del dólar, les mesmes duldes que tan frenando la xuba de les bolses. Los mercaos financieros tuvieron una selmana bien probetaya en resultaos ensin munchos cambeos nel casu de la Bolsa de Madrid.

Pieslle en positivo'l vienres al otru llau del Atlánticu. L'índiz Dow Jones trancó nos 10.213,22 puntos lo que supón una xuba del 0,41%. L'otru índiz de referencia, el tecnolóxicu Nasdaq, asitióse nos 1.946,33 puntos con una meyora del 0,57%. Nel Vieyu Continente'l pieslle foi más estremáu. Asina, nes places bursátiles de Llondres y Milán algamaron el vienres un pieslle en positivo mentanto que París repitió'l nivel del xueves pasáu y Francfort tuvo pieslle en negativo.

L'Ibex-35 caltuvo la cota de los 8.000 con un volume de negociu de solo 1.667 millones d'euros. El veranu nótase tanto na cantidá d'operaciones como nel so volume. El selectivu Ibex peslló nos 8.047,50 puntos (-0,46%). Ferrovial foi'l valor estrella siguío d'Enagás y Altadis. Nel terrén de les perdes destacaron Zeltia, Popular, Prisa y Sogecable.

L'anuncia de la selmana ye la próxima OPV de Probitas Pharma, la biofarmacéutica de la familia catalana Grifols, que ya marcó'l preciu de l'acción en 3,30 euros, el más altu na banda de referencia.

El dólar tuvo una cayida fuerte asitiándose respective a la divisa europea nos mesmos niveles que'l mes de marzu.

La divisa de los Estaos Uníos tamién ta perdiendo fuercia con otres divises como ye'l casu del francu suizu, que marcó un máximu nos últimos cinco meses respective al dolar. La cercanía de les elecciones a la Casa Blanca ta poniendo munches duldes alrodiu la seguranza interior de la primer potencia asina como'l desastrosu resultáu económicu de la política económica del presidente George Bush. El casu ye que l'euru yá val 1,2385 dólares unidá. Solo una xuba de tipos de la Reserva Federal pue tirar p'arriba pel dólar y meyorar les sos expectatives a curtiu plazu nel mercáu de divises.

Revueltu de cotizaciones del petroleu nel mercáu enerxéticu.

Nel mercáu de Llondres el barril Brent finó la selmana nos 37,6 dólares mentanto que nel mercáu de Texas asitióse penriba los 40. De toles formes les anuncies de países como Kuwait de xubir la producción nun van estabilizar los precios a mediu plazu énte la pergrande demanda enerxética y los problemes de comercialización del oru prieto iraquino. Otramiente, nel mercáu de renta fixo, xuba de los bonos. El bonu alemán a diez años algamó una rentabilidá del 4,229%.