Cayida de les bolses nuna selmana gris

La mala traza que presenten les estadístiques macroeconómiques xunta la cayida nos ingresos de delles multinacionales ficieron una selmana bursátil bien probe, con perdes asgaya tanto en Wall Street como nes places europees. Mentantu l´euru recupera posiciones con una pequeña xuba pola baxada de la confianza de los inversores nel dólar, l´Ibex tuvo una cayida selmanal penriba´l 2,5% colo que peligra la cota psicolóxica de los 7.000 puntos.



Nos Estaos Xuníos los datos nun foron bonos. El probe datu de ventes al por menor (+0,6%) y la xuba de los precios de la producción del 3,4% acompañaron al mal datu de confianza de la Universidá de Michigan, una de les estadístiques que suelen sofitar les xubes na bolsa o esfarraplala y qu'esta vegada nun faoi datu pa caltener les xubes de les últimes selmanes. N'Europa destacaron la cayida del 1,1% de la producción industrial francesa y la baxada del 2,7% nos pidíos industriales n'Italia. Wall Street peslló'l vienres en positivo dempués d´una selmana de perdes, pero nel conxuntu de la selmana les perdes marcaron la mayoría de los valores nos Estaos Xuníos. L´índiz Dow Jones quedó cásique como taba con 9.471,55 puntos mentantu'l tecnolóxicu Nasdaq nos 1.018,63 puntos con una xuba del 0,22%.



Los mercaos internacionales pasaron de les duldes a una venta contínua de valores, lo que fizo una selmana con una tendencia baxista. Wall Street tiró poles cayíes nos parqués europeos, llevando'l palu más gordu l´índiz alemán Dax (-2%). Londres, París y Milán tuvieron delles perdes, siendo los valores financieros los más castigaos anque hebo bones anuncies de resultaos de compañíes como Nokia o Philips.



N'España l'Ibex asitiose nos 7.022,90 puntos con una cayida selmanal del 2,9% lo que ye ún de los peores resultaos del añu. De toles formes los analistes estimen que l´índiz Ibex-35 va trancar esti añu alrodiu los 7.500 puntos, lo que ye un bon datu dempués de tres años siguíos con perdes.Ensin dulda la estrella bursátil en Madrid ye Sogecable, con una xuba anual del 180%, lo que diz muncho del bon trabayu que fizo Polanco fcola negociación de les plataformes dixitales. Nel tarrén de les cayíes entraron BBVA, SCH, Repsol y el Grupu Telefónica, siendo'l peor valor FENOSA, que dexó les sos inversiones na República Dominicana con unes minusvalíes de más de 150 millones d´euros. A la contra, Metrovacesa foi un de los pocos valores xunta Sogecable que pesllaron la selmana en positivo. Bankinter tuvo una bona selmana pola entrada nel so capital del inversor indiu Ram Bhavani, ex - conseyeru del Banco Zaragozano y qu'anguaño tien el 5,25% de Bankinter.



Baxó'l preciu del oru prieto pa quedar en 26,6 dólares barriles lo que supón una cayida del 1,55%. Esta cayida del nun ye más que temporal y especulativa pola prósima mengua del consumu de gasolina nos Estaos Xuníos como ye normal cada añu en pasando'l veranu. Los problemes n'Iraq y l'interés de los países de la OPEP por caltener el preciu sobre los 28 dólares/barril aseguren xubes nel mercáu enerxéticu. L´euru medró gracies a los malos datos del otru lláu del Atlánticu, llegando a los 1,13 dólares. Los bonos tamién tuvieron una bona selmana con una meyora na rentabilidá de los bonos a llargu plazu.