Catalunya salió a la cai pa reclamar la independencia del país

|

2.000.000 de manifestantes –600.000, según la Delegación del Gobiernu estatal– participaron na manifestación independentista convocada en Barcelona. Trátase de la movilización más masiva de la historia de Catalunya.

Más de mil autocares desplazáronse hasta’l centru de Barcelona pa tresportar xente a la convocatoria de l’Assemblea Nacional Catalana (ANC) col oxetu de celebrar la Diada Nacional de Catalunya con una manifestación masiva baxo’l lema ‘Catalunya, nou estat d’Europa’. La respuesta de la población catalana foi masiva, con 2.000.000 de persones presentes na marcha, lo qu’obligó a la cabecera de la mesma a treslladase a la confluencia de Pau Claris con Casp pol colapsu nel Paséu de Gràcia con Gran Via.

Los manifestantes entonaron cantares como 'L'Estaca', de Lluís Llach –que tuvo na cabecera–; 'Què volen aquesta gent?', de Maria del Mar Bonet; y el popular 'Himne dels Segadors'. Ente les pancartes, pudo vese lemes que reclamaben el derechu a decidir de Catalunya, tanto en catalán como en castellanu y inglés: ‘España, este expolio es genocida’, ‘Vuestro odio es nuestro adiós’, ‘Yes we can’ y ‘Catalonia is not Spain’. Tamién hubo mensaxes contra'l líder d'Unió, Josep Antoni Duren, y reclamos al presidente de la Generalitat, Artur Mas, pa que "plante a España".

A la marcha acudió una representación amplia de políticos y de la sociedá civil catalana, ente ellos l'ex presidente Jordi Pujol y los ex presidentes del Parlament, Joan Rigol y Ernest Benach. Tamién tuvo una delegación de CiU ente la que figuraben la vicepresidenta Joana Ortega. Artur Mas nun tuvo na marcha, qu'apoyó "de manera anímica", yá que consideró que'l so cargu institucional nun-y permitía dir. Sicasí, tuvo presente nella, y en primer fila de la delegación nacionalista, la so muyer, Helena Rakosnik, xunto a dellos conseyeros de la Generalitat y el presidente de la Diputación de Lleida, Joan Reñé, ente otros.

Al final de la marcha, celebróse un actu políticu nel que destacó la emisión d’un videu nel que delles personalidaes catalanes garraben una tarxeta verde cola que reclamaben la independencia pal país. Ente ellos, destacó la figura del téunicu Josep Guardiola.

 

Contador Estadistiques