Carlos Rubiera completa con ‘30 asturianaes’ más de venti años d’estudiu, revisión y composición de la canción asturiana

|
Carlos Rubiera en '30 asturianaes'

Una gran obra en formatu llibru, acompañáu de 3 CD, conforma ‘30 asturianaes’ de Carlos Rubiera. El cantante de Garbelles de Baxo completa con esti trabayu más de venti años d’estudiu, revisión y composición nel ámbitu de la canción asturiana, na que sigue la estela de los clásicos, pero cola perspeutiva del tiempu actual.

El llibru, editáu por Goxe Producciones, ábrese con una introducción de Xune Elipe, a lo que sigue un testu de Rubiera entituláu ‘Trabayando l’asturianada’ que ye una revisión del espublizáu nel númberu 23 de la revista ‘Cultures’ de l’Academia de la Llingua Asturiana. “Enfrentame cola asturianada como cantador y compositor foi xera difícil, al empar qu’apasionante: yera ponese a trabayar con un xéneru tradicional que la mio xeneración nun tenía sentío nin vivío como les anteriores xeneraciones d’asturianos”, entama’l mesmu.

Darréu rellata la so esperiencia vital al rodiu la música, en xeneral, y l’asturianada, en particular; un análisis d’esti “cante llíricu popular” y una esposición de les comparatives con otros cantes populares, como se suel facer col cante ‘jondo’ andaluz, que da llugar a la reflexón “l’asturianada ye un xéneru musical autóctonu, propiu y orixinal del nuesu país”. Un xéneru que llegó a los nuesos díes “porque ta fondamente enraigonáu na cultura popular-tradicional del pueblu asturianu”, rellata.

‘Les ‘30 asturianaes’ de Carlos Rubiera. Cartografía d’una escucha posible’, robláu pol musicólogu Llorián García, da continuidá al llibru enantes de llegar a los testos de los cantares, con esplicaciones na mayoría de casos, qu’interpreta Rubiera nos discos que vieno espublizando años atrás, que recopila nesta edición, y al que suma agora un terceru. Son 30 pieces vocales, tradicionales unes, del propiu Rubiera otres, xunto con trés pieces instrumentales orixinales pa gaita, contando pa la so grabación cola collaboración con artistes d’importancia: José Angel Hevia, María José Hevia, Javier Tejedor, Xuacu Amieva, la cantadora Mariluz Cristóbal Caunedo, el cantautor Rafa Lorenzo, la cantante folk cántabra Almudena López, los pianistes Gabino Antuña y Óscar Camacho, l’acordionista María Álvarez, los gaiteros Diego Pangua, Flavio Rodríguez Benito y Llorián García, la Coral Villa Blanca de Ḷḷuarca y otres voces y instrumentistes de primer nivel, hasta completar una nómina de ventiseis nomes destacaos de la música asturiana actual.

‘Morenina de Caldones’, ‘Yá nun va a La Camocha’, ‘De les piragües del Seya’, ‘Caballu al verde’, la instrumental ‘Molín de Garbelles’, ‘Van pa L’Habana’, ‘Crióme mio madre’, ‘Pasé’l puertu de Payares’ o ‘Tengo yo una pumarada’ son dalgunos de los cantares incluyíos nos discos. “La variedá estilística (tonada brava, ayerana, soberana, vaqueira, añada, dialogada, a capella, a la gaita...), la diversidá temática, la rigurosidá llingüística, los arreglos sobrios o más exhuberantes, y hasta la esperimentación, faen d’esti trabayu una especie d’enciclopedia sonora de l'asturianada”, apunten dende Goxe, que califiquen a ‘30 asturianaes’ como “una obra llamada a ser fonte d’inspiración y estudiu pa les nueves xeneraciones de cantadores; a perdurar nel tiempu y a dexar buelga na historia de la Canción Asturiana”.

Como valor añadíu, cada llibru va numberáu, con una fueya de roble estampada a mano y firmáu pol autor, lo que fai que cada exemplar sía únicu y distintu.

Contador Estadistiques