Canobbio dexó ensin premiu al Sporting

Sporting y Celta xugaben en Vigo un partíu en que los gallegos xugaben les sos opciones pa metese en plaza d'ascensu y los asturianos veníen cola obligación de demostrar qu'entovía podíen postular a puestos altos y confirmar la meyora de xuegu de les últimes selmanes.

Asina entamaba un partíu de poder a poder ente dos equipos mui igualaos, como yá se demostrare n'El Molinón na primer vuelta. D'aquella, un gol de Javi Fuego franciere la igualada, dexando al Sporting cerca de la zona d'ascensu mientres que'l Celta vía'l peligru de la parte baxa de la tabla nun entamu de competición taramiellante pal equipu vigués, pero ayeri la situación, mediu campeonatu dempués, taba dafechu entornada, y asina foi que'l Celta salió de mano buscando con más rixu la portería del Sporting, que se dedicó a cortar con bastante oficiu y seriedá toles entraes del equipu azul. Los xugadores asturianos aguantaron la primer fola del Celta y al cuartu d'hora salieron en busca de la portería rival, metiéndose en campu rival les más de les veces pela banda izquierda gracies a llabor de Juan, pero los últimos metros de la carrera asturiana quedaben siempre cortaos, y nin Calandria nin Ismael acababen d'entrar nel área del Celta.

Pinto y Roberto, los dos porteros, marcharon al descansu ensin tocar el pelotu, pero nel segundu tiempu diben tener ocasión de demostrar por que tienen el puestu de titulares nos sos equipos. Dorado, ún de los xugadores que más tan rindiendo nel Sporting nes últimes selmanes, lanzó un frayu que Pinto tuvo d'esforzase pa echar a corner, mientres que l'arrebatedor del Sporting llibró'l gol nun remate envelenáu de Canobbio. L'árbitrio marcaba'l descuentu en trés minutos y el públicu entamaba a abandonar les grades d'un Balaidos que daba por bonu l'empate, pero entós Borreguero cometía una falta a seis metros de l'área, una posición con bon descuellu pa un tirador como Canobbio. Roberto nun pudo atayar el tiru axustáu del internacional uruguayu y el Sporting vio una vegada más como les sos esperances se consumíen a balón paráu nun partíu en que los asturianos, ensin facer ocasiones pa merecer el trunfu, bien ganáu teníen l'empate.