Cándido y Morala van recurrir la sentencia de 3 años de cárcele

Dempués de facese pública la condena de trés años de cárcele a los sindicalistes Cándido González Carnero y Juan Martínez Morala, acusaos del estrozu d'una cámara de vídeu de seguridá nel trescursu de les movilizaciones del sector naval, los dos condenaos declararon que van recurrir la sentencia énte'l Tribunal Superior de Xusticia d'Asturies. Morala y Carnero declararon que la sentencia ye "un eslabón más de la trama política y policial que criminaliza les protestes llaborales pa trancar l'astilleru y construir pisos de luxu".

Cándido González Carnero calificó la sentencia de "linchamientu pa llevar alantre una especulación urbanística" y manifestóse enfadáu porque la sentencia se filtrare a la prensa enantes de que se-y notificare oficialmente, dalgo qu'esplicó como un intentu de debilitar el fechu de que fueren ellos mesmos los que comunicaren a los medios la resolución del xuiciu. Carnero asegura que tres de la condena hai "intereses políticos" y declaró la so sorpresa pol resultáu del xuiciu, del que creyó que diben salir absueltos. Ello ye que'l sindicalista afítase na so inocencia y refuga polo tanto solicitar l'indultu "por una cuestión de principios ideolóxicos".