Candás celebra los Alcuentros Atlánticos

El Grupu de Baille San Félix de Candás entama del 25 al 28 d'agostu los "I Alcuentros Atlánticos" que van enllenar les cais de la villa de sones asturianos y bretones gacies a la presencia del Bagad Gwengamp, qu'abre un desfile que va salir del muelle a les diez de la nueche con recorríu hasta'l teatru Prendes.

Mañana, a les ocho la tarde, va ser el mesmu grupu bretón el que dea otru desfile acompañáu pola Banda de gaites de Candás y el grupu de baille San Félix ente'l muelle y el parque Les Conserveres. P'acabar, la Plaza la Baragaña va ser l'escenariu de la folixa de la nueche del sábadu, con una gran "Xuntanza atlántica" na que van participar el Bagad Gwengamp, el grupu "San Félix" y tamién les pandereteres de Dulcamara y el grupu Tuenda, una formación na que s'axunten músicos asturianos d'otros grandes grupos y qu'integren Xosé Ambás (N'Arba) Pepín Muñalén (La Bandina'l Tombo) y Elías García (Llan de Cubel).

Como complementu d'estos Alcuentros, el grupu "San Félix" presenta tamién el primer númberu de la revista "El Cuirno" que, con calter añal, va compilar artículos d'investigación y escritos lliterarios que tengan la comarca del Cabu Peñes como marcu de referencia. El primer númberu d'esta revista cuenta con collaboraciones de Xulio Viejo, qu'escribe sobre Antón de Marirreguera, Alberto Álvarez Peña (Lleendes de Culiebres en Conceyu Carreño), Armando Rodríguez (la bandera del Reximientu de Candás y Lluanco) o Pedro Busto, que recupera los trabayos del iluustráu Carlos Benito González de Posada, ente otros.