Cabudañu del 11-M

Poco dempués de les 7 y 30 minutos de la mañana del 11 de marzu del 2004 cuando se vivíen los últimos díes de la campaña electoral pa les xenerales del 2004, cuatro bombes españaben nun espaciu de cinco minutos n'otros tantos vagones de tren de cercaníes de Madrid, causando una hecatombe que yera la mayor de la historia nun atentáu n'Europa. A lo llargo del día, el recuentu de les muertes na estación d'Atocha xubía hasta ponese nes 191, y llegaben a les 1.500 les persones que taben ingresaes con mancadures de distinta gravedá nos hospitales de la ciudá.

El ministru d'interior Ángel Acebes apaecía a poques hores del atentáu asegurando que la responsabilidá de les bombes yera dafechu de la banda terrorista ETA, una teoría que quedaba probada pal ministru pol emplegu nos trenes del mesmu esplosivu Titadine que gastaba la ETA. Poco dempués de l'anuncia del gobiernu, Arnaldo Otegui, representante de la illegalizada Batasuna, declaraba per una radio vasca que nun creía qu'ETA tuviere que ver colos atentaos, y autoridaes internacionales como'l ministru británicu Jack Straw apuntaben pa contra'l terrorismu islámicu. Mientres el presidente Aznar declaraba qu'a los asesinaos "matáronlos pol cenciellu fechu de ser españoles" el gobiernu aneciaba en defender l'autoría d'ETA, aporfiando por ella incluso dempués d'apaecer al día dempués les primeres prebes qu'apuntaben a la redolada del terrorismu integrista islámicu d'Al Qaeda.

La campaña electoral quedó anulada y pa entós, tola ciudadanía taba echao a la cai nunes manifestaciones de duelu que, en munchos casos acabaron por ser de protesta contra l'actitú del Gobiernu. Mientres na manifestación d'Uviéu, la mayor de la historia d'Asturies, bien de los manifestantes daben voces entrugándo-y a la delegada del Gobiernu Mercedes Fernández por "la verdá" sobre l'autoría de los atentaos, en Cataluña la cosa tuvo a piques de llegar a mayores, y el ministru Josep Piqué tuvo de guardase del ataque d'un grupu de manifestantes na marcha de duelu de Barcelona.

Les prebes qu'apuntaben a Al-Qaeda apaecíen una tres d'otra, y en llegando a la xornada de reflexón del sábadu 13 de marzu, el ministru Acebes daba l'anuncia de l'apaición d'un video nel qu'Al Qaeda reivindicaba l'autoría del atentáu, que'l grupu terrorista de raigón islamista xustificaba pola participación d'España na coalición qu'atacare Iraq encabezada polos EEUU, produciéndose darréu d'ello concentraciones de protesta delantre de les sés del PP en toa España, siendo les d'Asturies particularmente sonaes por participar nelles conocíos cargos públicos del PSOE y d'Izquierda Xunida, argumentu qu'emplegó'l PP pa acusar a la redolada del PSOE de tar trés d'elles y denunciales énte la Xunta Electoral.

El día 10 de marzu, el PP tenía toles de ganar, acordies colo qu'apuntaben les encuestes. 72 hores dempués, la cita electoral dexaba un resultáu que valtaba toles previsiones. El trunfu del PSOE ponía a José Luis Rodríguez Zapatero de presidente del estáu español nuna de les vueltes más inesperaes de la historia política de recién. Una de les promeses del nuevu gobiernu taba la d'entamar una comisión d'investigación en Parlamentu sobre les responsabilidaes polítiques nel 11-M. La comisión parllamentaria tardó hasta esta mesma selmana n'apautar un primer testu d'encamientos sobre seguridá que nun aclaria responsabilidaes.

A lo llargo d'esti añu, Asturies entró nel rellatu del 11M con un papel bien tristayu al conocese a que los esplosivos emplegaos nos atentaos salieren d'Asturies. L'apaición, dempués de tiempu guardáu, del testimoniu del confidente Francisco Javier Lavandera, que nel añu 2001 yá denunciare la venta d'esplosivos de mina que facíen Antonio Toro y Emilio Suárez Trashorras destapó una trama d'illegalidaes de consecuencies que nun se conocen en tola so estensión.

L'archivu del casu de la venta d'esplosivos por parte de la fiscalía ensin protesta de los estamentos políticos nin policiales apurre más solombra a un aspectu escuru de la realidá asturiana chiscáu d'episodios murnios como'l de la muerte de la muyer del confidente Lavandera, que s'afogó na playa de San llorienzo de Xixón n'estrañes circunstancies.

Finalmente, l'asociación que representa a les víctimes del atentáu, denuncia un añu dempués l'escaezu y la falta d'atención en que tan dexando les instituciones a les víctimes, sorrayando amás que nun quieren ver reproducíes güei en tolos medios los vídeos coles imáxenes d'aquel día polos murnios recuerdos que los acompañen, refugando actos de conmemoracióncomo'l de tocar les campanes de les ilesies de Madrid xusto a la hora de los atentaos.

Enllaces
Estoyos de prensa coles portaes de los periódicos la selmana del 11M: Muséu de noticies y Bitácoras.com
Cadena SER. La canal de radio que xugó un papel más importante nel 11M va colgar tolos archivos d'audio cola programación íntegra d'aquellos díes