César Movilla señala que “si acepto una moción n’asturianu, taría incumpliendo la llei”

L’alcalde de Noreña, César Movilla, xustificó’l martes la so decisión de refugar una moción de Conceyu Abiertu por tar en llingua asturiana. “Si acepto una moción n’asturianu, taría incumpliendo la llei”, afirmó.
 
La intervención de Movilla, recoyida pol diariu El Comercio, tuvo llugar nún de los dos plenos estraordinarios onde debía tratase la moción de Conceyu Abiertu por Noreña en relación a la rehabilitación de la ponte ferroviaria de Rebalde. “Díbamos a incluyila porque a nós tamién nos interesaba, pero taba n’asturianu y pa eso’l ROF (Reglamento de Organización y Funcionamiento)ye claro. Según el so artículu 86, les convocatories, ordenances, mociones y propuestes han de facese en llingua castellana o llengua cooficial, nel casu de que l’haya», aseguró. N’opinión de l’alcalde socialista, otres entidaes “supramunicipales con capacidá de llexislar” han de ser l’oxetu de les crítiques de los sectores favoratibles a la oficialidá y non la so persona.
 
La Xunta pola Defensa de la Llingua Asturiana (XPDLLA) amosó ayeri un comunicáu nel que “desixe una rectificación inmediata del Conceyu de Noreña” pola so actuación y y encamienta a los partíos políticos asturianos a que “pongan les cartes sobre la mesa énte la prósima campaña electoral, yá que si lo que se quier ye prohibir la llingua asturiana, ye un fraude presentase énte la cuidadanía como defensores de la so promoción y difusión”. Pa esti coleutivu ciudadanu, l’actitú de Movilla “vuelve a rescamplar que la llingua asturiana ye la única llingua prohibida nel Estau español, y los asturianos y les asturianes somos los únicos ciudadanos a los que se nos niega la posibilidá de escoyer en qué llingua queremos vivir”.

Comparte...                                    

Enllaz permanente