Bonos datos de los alumnos asturianos na escuela

Los estudiantes asturianos algamen una competencia científica de 508 puntos, lo que los asitia 30 puntos penriba de la nacional, y ocho penriba de la media de la Organización pa la Cooperación y el Desarrollu Económicu (OCDE) y, según l'informe ellaboráu nel 2006 pol Programa pa la Evaluación Internacional de los Alumnos (PISA). La puntuación algamada por Asturies en ciencies ye más alta que la media de los países como Dinamarca, Francia, Islandia, Estaos Uníos, España, Eslovaquia, Noruega, Luxemburgo, Italia, Portugal, Grecia, Turquía y México. Sólo superen a Asturies, Finlandia, Países Baxos, Canadá, Xapón, Nueva Zelanda, Australia y Corea.

Asina lo indicó en rueda prensa n'Uviéu el conseyeru d'Educación y Ciencia del Pricipáu d'Asturies, José Lui Iglesias Riopedre, quien valoró que la comunidá rexistra un eleváu grau de rendimientu académicu, sólo superada polos resultaos de Finlandia. "Existe un escasu esparcimientu de resultaos ente los centros", señaló'l conseyeru como datu positivu.

El responsable esplicó tamién que PISA establez seis niveles xerárquicos pa describir la competencia científica del alumnáu, y que'l 82 por cientu de los asturianos tán nos niveles intermedios de competencia (2, 3 y 4), mientres que sólo un 12 por cientu ta nel nivel más baxu, qu'indica la población en peligru d'esclusión. Asina, el Principáu ta tamién meyor asitiáu que la media nacional (20%) y de la OCDE (19%).
En cuantes a les diferencie sente sexos, el conseyeru indicó qu'esta ye menor n'Asturies que n'otres comunidaes o países. Los varones algamaron una media de 511 puntos, y les moces de 506, polo que Riopedre nun la consideró significativa.
De la mesma manera, reseñó qu'Asturies, a pesar de contar con un PIB modestu, dispón d'un alumnáu con meyores resultaos qu'otres comunidaes autónomes y países más ricos. El rendimientu ta penriba y de manera independiente del 'status' social y cultural de la población. Según Riopedre, eso permite afirmar que "la educación n'Asturies dispón d'un valor añadíu".
Resultáu p'Asturies en función de la so riqueza esperábase sobre 490 puntos. Los resultaos algamaos coloquen al Principáu nuna situación asemeyada a la de Bélxica, Irlanda, Suecia o Suiza, que tien un PIB per cápita hasta un 60 por cientu mayor qu'Asturies.


Per otra parte, l'informe tamién evaluó'l nivel de los estudiantes nes árees de matemátiques y comprensión llectora, anque según el conseyeru, los resutaos d'estes pruebes nun son tan veraces porque se dedicó menos tiempu al so desarrollu (25% del tiempu, frente al 50% del área científica) y porque la muestra emplegada tamién foi menor (750 alumnos, frente a 1.579 estudiantes de la prueba de ciencies).
Na evaluación de competencia matemática, los asturianos asitiáronse 17 puntos penriba de la media nacional y al mesmu nivel que la media de la OCDE, con 497 puntos.
Sin embargu, na comprensión llectora Asturies superó en 16 puntos la media española, pero asitióse 15 puntos perbaxo de la media de la OCDE. Nestos parámetros tán tamién Portugal, Luxemburgo o Croacia.


El sindicatu d'enseñanza SUATEA emitió un comunicáu matizando los datos d'esti informe, que diz que namás atiende a datos mui concreteos sin rellacionalos col contestu del sistema educativu al traviés del que se llogren. El sindicatu pidió una mayor inversión estatal n'enseñanza, hasta llegar al 7% pa poder llograr un sistema educativu realmente de calidá y rebaxar la ratio d'alumnos por clas.