Bloque-UNA presenten a Fernando Ornosa de candidatu n'Uviéu

 La coalición formada poles dos organizaciones asturianes presentó güei al so candidatu, Fernando Ornosa (Uviéu, 1958), persona venceyada a movimientos políticos y sociales dende los años 70, responsable del Archivu de la Música Tradicional del Pueblu d'Asturies, y que participa en política activa dende la so incorporación a UNA nel añu 2009.

 
Na presentación, Ornosa faló de la necesidá qu'Uviéu tien d'oxixenu y d'una tresformación pa finar coles formes "antidemocrátiques" y fixo un repás por delles de les actuaciones que, según la coalición son parte de les polítiques que ye necesario camudar, como'l parking d'Uría. Amás, el candidatu insistió amás na pluralidá de la candidatura y la importancia d'Uviéu como capital vertebradora del país.

Nel actu, que foi presentáu por Rafael Palacios y Yolanda González Huergo, tuvieron presentes dellos miembros integrantes de la candidatura como Nacho González, Marta Montero, Paco Mori, Zaquiel Sánchez, Candelas Villaro, Carlos Lastra o Xuan Prado, anque se dexó pa una fecha posterior l'anuncia de les 27 persones que, según Ornosa, "aspiramos a cambiar una manera de facer política, aportamos cares nueves, idees nueves, aire fresco y llimpio, la necesaria pluralidá qu’arriquecería la vida municipal con una opción política que nun ta representada nel ayuntamientu".