Bimenes yá tien preparada la X Fiesta de la Oficialidá

El 4 de xunetu de 1997 el Conceyu de Bimenes abrió un frente de batalla política nuevu al declarar l'asturianu llingua oficial dientro de les sos llendes alministratives. Bimenes foi'l primer conceyu nel que s'esperimentó una estratexa pa forciar la declaración d'oficialidá del asturianu nun momentu en que'l debate pa la reforma estatutaria taba nel so momentu más intensu. Al exemplu de Bimenes, qu'abrió estaya, siguieron los de Casu, Castrillón, Morcín, Llangréu, Teberga, Llaviana y Llanera. Anque los más d'ellos yeren conceyos gobernaos por Izquierda Xunida, fuerza política qu'abanderó'l procesu, en dellos llugares rexistróse'l votu al favor del PSOE y nun d'ellos, el conceyu de Casu, foi precisamente'l PP el que lo fexo posible colos sos votos.

Naquella década de los 90 taba llevándose alantre una reforma estatutaria que pal asturianismu peslló en falso al nun espeyase les demandes históriques na lletra final de la Carta Magna asturiana, pero la reforma tamién dexó pal asturianismu derrotáu'l gol de la vergoña en forma d'una llei d'usu que, hasta agora nun ye otro que papel moyao y en forma tamién de media docena de conceyos que se remontaron pa declarar l'asturianu oficial, anque ello tampoco valió pa muncho. Fernando Fernández Noval, d'aquella delegáu del Gobiernu y conocíu enemigu del asturianu, encargose en persona de pleitear contra aquellos pronunciamientos inocentes, que foron cayendo un tres d'otru al ritmu machacón de les sentencies que soltaba'l Tribunal Superior de Xusticia d'Asturies.

Dende aquel día celébrase en Bimenes la Fiesta de la Oficialidá. Dende Asturies.com encamentamos a pasar pel conceyu Yerbatu pa esfrutar de les actividaes, que puen consultase nesti enllaz y que van entamar el 23 de xunu, espurriéndose hasta'l 1 de xunetu. El pregón va correr al cargu del profesor Xulio Vixil.