Bimenes celebra siete años d'oficialidá
2 Xunetu, 2004 por Redacción
- Inicie sesión o rexístrese pa espublizar comentarios
La octava edición de la Fiesta de la Oficialidá en Bimenes celébrase esti fin de selmana en Xenra. El Director de Política llingüística del Principáu Ramón d'Andrés va lleer el pregón.
En 1997 Bimenes convirtióse nel primer conceyu asturianu en declarar la llingua asturiana como oficial dientro de les sos llendes. Lo que foi una fecha histórica pal asturianismu convirtióse nuna fiesta que tolos años remocica'l compromisu del conceyu col idioma. Siete años dempués, l'asturianu sigue ensin ser oficial nel estatutu, pero la carrera hacia la oficialidá entamada polos yerbatos sigue ehí como'l puntu d'aniciu d'una trayectoria na que'l asturianu nunca nun dexó de ser tema d'actualidá y de debate na sociedá.
El Director de Política llingüística del Principáu Ramón d'Andrés va lleer mañana un pregón nel que quier precísamente "agradecer" según les sos propies pallabres a Bimenes el fechu de declarar la oficialidá y caltener toos estos años la valentía d'esa declaración. D'Andrés llama tamién a toa persona comprometida col asturianu a dir xunta la xente de Bimenes a celebrar estos díes la oficialida.
Con too y con ello, la declaración nun remata un procesu normalizador. Al añu de dase la oficialidá en Bimenes, les primeres voces crítiques dicíen que nun había una política normalizadora consecuente con ello.
El mesmu Ramón d'Andrés reconoz nesti sentíu que les polítiques de normalización en Bimenes son meyorables, pero ello ye na mesma midida que en tolos demás conceyos, anque'l cenciellu fechu de la declaración de va siete años yá ye daqué que ye preciso emponderar.
Efrén d'Andrés
